Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 165 Hüküm no: 129 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi b. Mehmed’in İstinye’deki evini hanımı Müşerrefe bt. Abdullah’a hibe etmesi Hilâl-i sutûrda mastûr husûsun mahallinde tahrîri iltimâs olunmağın küttâb-ı mahkeme-i şerîfeden mevlânâ Abdülkerim Efendi b. Mahmud irsâl olunup ol dahi zeyl-i kitâbda isimleri mastûr olan müslimîn ile mahmiye-i Galata tevâbi‘inden kasaba-i Tophâne’de Mustafa Ağa mahallesinde vâki‘ mescid-i şerîf hâricinde akd-i meclis eyledikde yine mahalle-i mezbûre sükkânından Mahmud Çelebi b. Mehmed nâm râcil meclis-i şer‘-i hatîr-i lâzimü’t-tevkīrde zevcesi râfi‘atü’l-kitâb Müşerrefe bt. Abdullah nâm hâtun tarafından husûs-ı âti’l-beyânı hibe ve tasdîka vekîl olup mezbûre Müşerrefe’yi ma‘rifet-i şer‘iyye ile ârifân olan Hızır Efendi b. Kemal ve Hasan Beşe b. Abdullah şehâdetleri ile vekâleti sâbit olan Abdi Dede b. İskender nâm kimesne mahzarında ikrâr ve i‘tirâf edip bundan akdem vâlidem Aynî bt. İskender nâm hâtundan intikāl edip mahmiye-i mezbûre tevâbi‘inden nefs-i İstinye’de mahalle-i Derviş Çelebi’de vâki‘ bir tarafı Hasan Bâli b. ( ) mülkü ve bir tarafı Esirci Sefer mülkü ve bir buçuk zirâ‘ tarîk-i hâssı sâhil-i bahre (….?) ve bir tarafı tarîk-i âm ile mahdûd olan bir bâb tahtânî menzilimi zevcem mezbûre Müşerrefe’ye hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl ve kabz eyledi hâlâ mülk-i mevhûbudur, keyfe mâ teşâ’ ve tahtâr sâir emlâki gibi tasarruf eylesin dedikde mukırr-ı mezbûr Mahmud Çelebi’nin vech-i muharrer üzere sâdır olan kelâmını vekîl-i mezbûr Abdi Dede bi’l-muvâcehe tasdîk ve bi’l-müşâfehe tahkīk eylediklerinden sonra vâki‘ hâli mevlânâ-yı mezbûr mahallinde tahrîr, ba‘dehû meclis-i şer‘a gelip i‘lâm ve takrîr etmeğin mâ vaka‘a ketb olundu. Hurrire fî gurreti Rebî‘ilâhir li sene isneteyn ve hamsîn ve elf. Şuhûdü’l-hâl: El-Hâc Mahmud Beşe b. Abdullah er-Râcil, el-Hâc Süleyman [b.] Mehmed, Halil Çelebi b. Hızır Efendi, Siyavuş b. Abdullah, Osman Beşe, Hasan Beşe.