Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 167 Hüküm no: 131 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. eş-Şeyh Haydar’ın kölesi Yusuf b. Abdullah’ı azat etmiş olduğu Medîne-i Ebî Eyyûb-i Ensârî -radiye anhu Rabbühü’l-bârî- mahallâtından olup mahalle-i Bıçakçı’da sâkin işbu açık kaşlı elâ gözlü hıntıyyü’l-levn orta boylu Gürciyyü’l-asl müslimü’l-mille râfi‘ü’l-kitâb Yusuf b. Abdullah nâm kimesne meclis-i şer‘-i hatîr-i lâzimü’t-tevkīrde yine mahalle-i mezbûrede sâkin iken bundan akdem vefât eden Ali Efendi b. eş-Şeyh Haydar nâm müteveffânın sulbî sagīr oğulları Mehmed Çelebi ve Mustafa’ya ve sulbiye sagīre kızı Havva’ya kıbel-i şer‘den mansûb vasî olan kıdvetü meşâyihi’l-kirâm eş-Şeyh Abdullah Efendi b. Ali mahzarında takrîr-i da‘vâ edip abd-i memlûkü olduğumuz merkūm Ali Efendi hâl-i hayâtında ve kemâl-i akl-i sıhhatinde beni tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a irtihâl edip sülüs mâlı dahi benim kıymetime müsâ‘id olmağla cemî‘ mâlından âzâd olmuşumdur, suâl olunup mûcebiyle amel olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Yusuf’dan da‘vâsına mutâbık beyyine taleb olundukda udûl-i müslimînden Halil b. İbrahim el-Cündî ve Ali Beşe b. Ali nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr Ali Efendi hâl-i hayâtında ve kemâl-i sıhhatinde müdde‘î-i mezbûr Yusuf’u bizim huzûrumuzda tedbîr-i mutlak ile tedbîr edip ve hâlâ mezbûr Ali Efendi civâr-ı rahmet-i Hayy-i Kayyûma irtihâl ve intikāl edip müteveffâ-yı mezbûrun sülüs mâlı dahi merkūm Yusuf’un kıymetine müsâ‘id olup cemî‘ mâlından âzâd olmuşdur, biz bu husûsa bu vech üzere şâhidleriz ve şehâdet dahi ederiz, her birileri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a olmağın mezbûr Yusuf’un ıtkına hüküm birle mâ vaka‘a gıbbe’t-taleb ketb olundu. Cerâ zâlike ve hurrire fi’l-yevmi’s-sâmin ve’l-ışrîn min şehri Rebî‘ilâhir li sene isneteyn ve hamsîn ve elf. Şuhûdü’l-hâl: Fahrü’l-müderrisîn Ömer Efendi b. Behram, Süleyman Çelebi b. Abdullah, Şaban Çelebi b. Kenan, Attâr Mehmed Çelebi b. Musa, Receb [b.] Abdullah, el-Hâc Bostan b. İsmail, Mehmed Efendi b. Abbas, Mehmed Çelebi b. el-Hâc Enbiyâ, Yusuf Efendi el-Hatîb ve gayruhüm mine’l-huzzâr.