Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 168 Hüküm no: 132 Orijinal metin no: [39a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa’nın kızı Hatice’nin el-Hâc Ömer Reis’e muârazan men edilmesi Husûs-ı âti’l-beyânı mahallinde istimâ‘ ve tahrîr için kıbel-i şer‘-i mutahhardan âdem taleb olundukda bu fakīr zeyl-i kitâbda mastûrü’l-esâmî müslimîn ve hâssa mi‘mârlarından el-Hâc Hasan b. Ömer ve Ali b. Yusuf nâm kimesne ile mahmiye-i Galata’ya tâbi‘ kasaba-i Kasımpaşa’da Tahtakadı mahallesinde sâkin iken bundan akdem vefât eden Bîzebân Mehmed Ağa nâm müteveffânın muhallefâtından olan inde’l-ahâlî ve’l-cîrân ma‘lûmü’l-hudûd olup sulbiye kızı Âişe nâm hâtun sâkine olduğu menzilde akd-i meclis olundukda el-Hâc Ömer Reis nâm kimesne mahfil-i kazâda yine müteveffâ-yı mezbûrun sulbiye kızı Âişe Hâtun sâkine olduğu menzilde akd-i meclis olundukda el-Hâc Ömer Reis nâm kimesne mahfil-i kazâda yine müteveffâ-yı mezbûrun sulbiye kızı Hatice nâm hâtun mahzarında takrîr-i da‘vâ edip müteveffâ-yı mezbûrun muhallefâtına mahlûta olup bir tarafı bağcı Hasan Bey mülkü ve bir tarafı müteveffâ-yı mezbûrun misâha olunan selâmlığa ve bir tarafı yine müteveffâ-yı mezbûrun misâha olan arsa-i gayr-ı mebniyeye ve bir tarafı müteveffâ-yı mezbûr Arab tarafında misâha olunan menzile [39b] müntehî olan iki bâb fevkānî ve iki bâb tahtânî ve bir kileri ve kenîfi müştemil olan menzili ben kendi mâlım ile binâ eylemiş iken mezbûre Hatice taksîm murâd edip ta‘arruz eder, suâl olunup mûcebiyle amel olunmasın taleb ederim dedikde gıbbe’s-suâl merkūme menzil-i mezbûrun merkūm Ömer Reis kendi mâlı ile binâ eylediğini münkire oldukda merkūm Reis’den sıdk-ı makāline beyyine taleb olundukda udûl-i müslimînden Mehmed Çelebi b. Mustafa ve Ebûbekir Çelebi b. Rıdvan nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka müteveffâ-yı mezbûrun menzili arsa-i gayr-ı mebniyeye olup merkūm Reis kendi mâlı ile binâ eylediğine biz şâhidleriz ve şehâdet dahi ederiz deyû her birileri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda mezbûre Hatice’yi merkūm Reis ile bî-vech mu‘ârazadan men‘ birle mâ vaka‘a bi’t-taleb ketb olundu. Tahrîren fi’l-yevmi’l-hâmis min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Mehmed Kapudân b. Hasan, Mustafa Ağa b. Mehmed el-Cündî, Mahmud Kapudân b. Şaban, es-Seyyid Mahmud Çelebi b. es-Seyyid Yusuf, Mustafa b. Abdullah, Mehmed Kapudân b. Ahmed.