Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 681 Hüküm no: 876 Orijinal metin no: [104b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Şaban’ın, câriyesi Bedirmâh bt. Abdullah’ı ölmeden önce âzat edip malının üçte birini ona vasiyet ettiği Mahmiye-i İstanbul’da Ayasofya-i Kebîr mahallesi sükkânından iken bundan akdem vefât eden el-Hâc Şaban b. ( ) verâseti sulbî kebîr oğlu Mehmed Çelebi’[ye] ve sulbiye kebîre kızı Meryem Hâtun’a münhasıra olduğu şer‘an mütehakkik oldukdan sonra mezbûre Meryem’in zevci ve tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Ramazan Bey b. İbrahim ve Ali Bey b. Durmuş nâm kimesneler şehâdetleriyle şer‘an vekâleti sâbit olan diğer Ramazan Ağa b. İbrahim nâm kimesne vekâleten ve mezbûr Mehmed Çelebi asâleten meclis-i şer‘-i şerîfde her biri ikrâr ve takrîr-i kelâm edip müteveffâ-yı mezbûr hayâtında kendiye rıkkıyyetini mu‘terife olan orta boylu, açık kaşlı, gök elâ gözlü Rûsiyyetü’l-asl bâ‘isetü’l-kitâb Bedirmâh bt. Abdullah [105a] nâm câriye-i memlûkesini tedbîr-i mutlak ile müdebbere edip ve sülüs malından mezbûre Bedirmâh’a on beş esedî guruş vere deyû vasiyyet edip musırran fevt oldukda sülüs malı vesâyâsına müsâ‘id olmağla mevsûfe-i mezbûre bilâ-si‘âyeten hürre olup velâ-i şer‘îden gayrı üzerinde kimesnenin hakkı kalmamışdır dediklerinde mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Musa Çelebi b. Ali, Abdülhalim Halîfe b. Osman, Yusuf Çelebi b. Mahmud, Ahmed Beşe b. Hasan, Mehmed Çelebi b. Süleyman.