Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 680 Hüküm no: 875 Orijinal metin no: [104b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zağarcıbaşı Osman Ağa’nın, Hacı Hüseyin b. Mustafa ile Andriye v. Manol’ün ortak olduğu Ayasofya-i Kebir Vakfı’na mukātaalı ev ve arsayı mütevelli izni ile satın aldığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi sâbıkan zağarcıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim Osman Ağa b. ( ) Dârü’l-hilâfeti’l-aliyye Kostantıniyye el-mahmiyye mahallâtından Kasab İvaz mahallesinde vâki‘ menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde mûmâ-ileyh Osman Ağa meclis-i ma‘kūd-ı mezbûrda mahmiye-i mezbûrda Deniz Abdal mahallesi sâkinlerinden sarrâc Hacı Hüseyin b. Mustafa ile Nişancı Cafer Çelebi mahallesi sükkânından Andriye v. Manol nâm zimmî muvâcehelerinde takrîr-i kelâm ve ta‘bîr ani’l-merâm edip bey‘ ve tefvîz-i âti’z-zikrin sudûruna değin ebniyesinin dört bölükde bir bölüğü mezbûr Hacı Hüseyin’in ve üç bölüğü mezbûr Andriye’nin [hakk-ı] müfevvazları ve arsasının dahi dört bölükde bir bölüğü mezbûr Hacı Hüseyin’in ve üç bölüğü mezbûr Andriye’nin hakk-ı müfevvazları olup ve mahmiye-i mezbûre hısnı ebvâbından Fenerkapısı hâricinde Abdi Subaşı mahallesinde vâki‘ bir tarafdan İbrahim Paşa veresesi sarayları ve bir tarafdan Şaban Efendi kethüdâsı Osman Ağa mülkü ve bir tarafdan sâhil-i bahr ve bir tarafdan tarîk-i âm ile mahdûd arsasının Ayasofya-i Kebîr vakfı’na senede kırk beş akçe mukāta‘ası olup sâhil-i bahr tarafında tabaka-i ulyâda ve tabaka-i vustâda ikişer bâb oda ve tabaka-i süflâda bir kayıkhâne ve tarîk-i âm tarafında fevkānî iki küçük ve iki büyük dört bâb oda ve altlarında bir bakkal ve bir kasab ve bir ekmekçi dükkânları ve birisi mu‘attal birisi müsta‘mel iki su kuyusu ve iki matbah ve havlu ve kenîfi müştemil menzillerinin ebniye-i memlûkesini cemî‘ü’t-tevâbî‘ ve levâhıkı ve âmme-i hukūk ve merâfıkı ile mezbûrân Hacı Hüseyin ve Andriye iki bin iki yüz elli kıt‘a esedî guruşa bana bey‘ ve teslîm ve arsasını dahi ma‘rifet-i mütevellî-i mezbûr ile meccânen bana ferâğ ve tefvîz edip ben dahi iştirâ ve tefevvuz ve tesellüm eylediğimden sonra semeni olan meblağ-ı mezkûr iki bin iki yüz elli kıt‘a esedî guruşu mezbûrân Hacı Hüseyin ve Andriye yedimden tamâmen ahz u kabz etmişlerdir suâl olunup takrîrleri tahrîr olunmak matlûbumdur dedikde mevlânâ-yı mezbûr dahi merkūmân Hacı Hüseyin ve Andriye’den suâl eyledikde her biri cevâblarında menzil-i mahdûd-ı mezkûrdan vech-i muharrer üzre mülkümüz olan ebniyesini mûmâ-ileyh Osman Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki bin iki yüz elli kıt‘a esedî guruşa bey‘ ve teslîm edip arsasını dahi [izn-i] mütevellî-i vakf-ı mezbûr ile müşârün-ileyh Osman Ağa’ya meccânen ferâğ ve tefvîz edip mûmâ-ileyh Osman Ağa dahi iştirâ ve tefevvuz ve tesellüm eyledikden sonra semeni olan meblağ-ı mezkûr iki bin iki yüz elli kıt‘a esedî guruşu yedinden tamâmen ahz u kabz eyledik ba‘de’l-yevm menzil-i mahdûd-ı mezbûrun ebniye-i memlûkesi mûmâ-ileyh Osman Ağa’nın mülk-i müşterâsı olmuşdur keyfe mâ yeşâ’ ve yahtâr ve arsası dahi hakk-ı müfevvazı olmuşdur emsâli gibi tasarruf eylesin dediklerinde mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Seyyid Mehmed Ağa b. es-Seyyid Mustafa, umdetü erbâbi’t-tahrîr ve’l-kalem Abdullah Efendi b. Abdurrahman, fahrü’l-akrân Ali Ağa b. Mehmed, Hüseyin Çavuş b. Receb, fahrü’l-eşbâh Mehmed Ağa b. İshak Beşe.