Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 173 Hüküm no: 139 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed Ağa’nın varislerinin muhallefâttan olan köle Murad b. Abdullah’daki sülüs hisselerini İbrahim Ağa b. Mehmed Ağa’ya satmaları Mahmiye-i Galata müzâfâtından olup kasaba-i Tophâne mahallâtından mahalle-i Cihangir sâkinelerinden iken bundan akdem vefât eden Ahmed Ağa b. Mehmed Ağa nâm müteveffânın verâseti zevce-i metrûkesi Âişe bt. Ahmed Ağa nâm hâtuna ve vâlidesi Râbia bt. Mehmed’e ve sulbî sagīr oğlu Mehmed Çelebi’ye ve sulbiye sagīre kızı Fâtıma’ya münhasıra olduğu şer‘an mütebeyyin ve mütehakkik oldukdan sonra sagīrân-ı mezbûrâna kıbel-i şer‘den mansûbe vasî ve vâlideleri merkūme Âişe Hâtun tarafından husûs-ı âti’l-beyânı bey‘a vekîl olup vekâleti ber nehc-i şer‘î sâbite olup vasiyy-i mezbûrenin li ebeveyn karındaşı fahrü’l-emâsil ve’l-akrân Mehmed Ağa b. Ahmed Ağa meclis-i şer‘-i hatîr-i lâzimü’t-tevkīrde müteveffâ-yı mezbûrun li ebeveyn karındaşı fahrü’l-emâsil ve’l-akrân hâfızü’l-kitâb İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip işbu hâzır bi’l-meclis olan orta boylu çatık kaşlı elâ gözlü kara sakallı Çerkeziyyü’l-asl Murad b. Abdullah nâm gulâmın sülüsân[ı] müşârün-ileyh İbrahim Ağa’nın olup ve sülüsü merhûm-ı mezbûr Ahmed Ağa’nın olmağın müteveffâ-yı mezbûrun zarûret-i deyni için gulâm-ı mezbûrun sülüsü bey‘ olunmak lâzım gelip ve merkūm Murad’ın kıyem-i kâmilesi te‘âtîsi memnû‘ olan züyûf akçe ile defter-i kassâm-ı sâbıkda on beş bin akçeye olup hâlâ cedîd akçe ile cümle kıymeti yirmi bir bin akçeye olmak üzere sülüsü yedi bin nakd-i râyic fi’l-vakt akçeye vekâletim hasebiyle merkūm İbrahim Ağa’ya bey‘-i bâtt-ı sahîh-i şer‘îyle bey‘ edip merkūm Murad’ın sülüs kıymeti için mersûm İbrahim Ağa yedinden yüz aded esedî guruş kıymeti ahz ü kabz edip husûs-ı mezbûra müte‘allik zimmetini ibrâ ve iskāt eyledim dedikde mukırr-ı mezbûr Mehmed Ağa’nın vech-i muharrer üzere cârî olan kelâmını el-mukarru lehü’l-mersûm İbrahim Ağa bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Hurrire fi’l-yevmi’s-sânî aşer min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Osman Ağa b. es-Seyyid Ahmed Ağa, el-Hâc Durak Efendi [b.] İlyas el-İmâm, el-Hâc Sefer Beşe b. Halil er-Râcil, Süleyman Ağa b. Mehmed Ağa, Solak Mehmed Çelebi eş-şehîr bi Kınalızâde, Abdurrahman Çelebi b. Hüseyin, Handan Bey b. Abdullah, Kaytas b. Abdullah, Mustafa el-Münâdî be Galata el-mahmiyye, Ali Dede b. Abdullah, Mahmud b. İlyas, Receb b. Abdullah, Hüseyin Çelebi [b.] Abdullah, Mehmed b. Mustafa.