Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 174 Hüküm no: 140 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed Ağa’nın varislerinin muhallefâttan olan bahçedeki hisselerini İbrahim Ağa b. Mehmed Ağa’ya satmaları Mahmiye-i Galata müzâfâtından olup kasaba-i Tophâne’de mahalle-i Cihangir sâkinlerinden iken bundan akdem vefât eden Ahmed Ağa b. Mehmed Ağa nâm müteveffânın verâseti zevce-i metrûkesi Âişe bt. Ahmed nâm hâtuna ve vâlidesi Râbia bt. Mehmed Ağa nâm hâtuna ve sulbî sagīr oğlu Mehmed Çelebi’ye ve sulbiye sagīre kızı Fâtıma’ya münhasıra olduğu şer‘an mütebeyyin ve mütehakkik oldukdan sonra sagīrân-ı mezbûrâna kıbel-i şer‘den mansûbe vasî olan vâlideleri mezbûre Âişe Hâtun tarafından husûs-ı âti’l-beyânı bey‘a vekîl olan vasiyy-i mezbûrenin li ebeveyn karındaşı fahrü’l-emâsil ve’l-akrân Mehmed Ağa b. Ahmed Ağa meclis-i hatîr-i lâzimü’t-tevkīrde müteveffâ-yı mezbûrun li ebeveyn karındaşı olup mahrûse-i Kostantıniyye’de mahalle-i el-Hâc Küçük’de sâkin işbu hâfızü’l-kitâb fahrü’l-a‘yân İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip mahalle-i mezbûrede vâki‘ üç aded Sed bahçenin hudûdu cânib-i garbîsi Fâtıma bt. Mümin Çavuş nâm hâtun mülkü ve yine ba‘zan Mümin Çavuş veresesine ve ba‘zan Rahîkīzâde odalarına ve cânibeyni tarîk-i âm ile müntehî olup içinde olan bir bâb fevkānî oda ve bir bâb tahtânî oda ve bir havuz ve eşcâr-ı müsmire ve gayr-ı müsmiresiyle zarûret-i deyn için bey‘i lâzım olmağın zikr olunan Sed bahçesinin nısfı müşârün-ileyh İbrahim Ağa’nın olmağla nısf-ı âharını dahi vekâletim hasebiyle merkūm İbrahim Ağa’ya on altı bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan Sed bahçesinin nısf-ı âharını dahi sâir emlâki gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm İbrahim Ağa bi’l-muvâcehe tasdîk ve bi’l-müşâfehe tahkīk eyledikde mahkeme-i şerîfe küttâbından Abdülkerim Efendi b. Mahmud zikr olunan bahçenin üzerine irsâl olunup ol dahi sâlifü’z-zikr bahçenin üzerine varıp zeyl-i kitâbda mastûrü’l-esâmî olan bî-garaz müslimîn bahçe-i mezbûrenin nısf kıymeti ancak on altı bin akçe değer, ekseri yeri harâba müşrif olmuş, nısf-ı âharı meblağ-ı mezbûr on altı bin akçeden ziyâde eylemez, hakk-ı karârı budur deyû her biri alâ tarîki’ş-şehâde ihbâr eylediklerini mevlânâ-yı mezbûr mahallinde tahrîr ve gelip bu tarafda alâ vukū‘ihî haber vermeğin mâ vaka‘a bi’t-taleb ketb olundu. Hurrire fi’l-yevmi’s-sânî aşer min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Es-Seyyid Osman Ağa b. Ahmed Ağa, el-Hâc Durak Efendi b. İlyas el-İmâm, Şeyh Hasan Efendi [b.] Hüseyin, Mehmed Çelebi b. Yusuf el-Müezzin, Mehmed b. İbrahim el-Müezzin, Ali Dede b. Abdullah, Rıdvan Dede b. Abdullah, Abdurrahman Çelebi b. Hüseyin.