Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 176 Hüküm no: 142 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed Ağa’nın varislerinin muhallefâttan olan bahçedeki hisselerini İbrahim Ağa b. Mehmed Ağa’ya satmaları Mahmiye-i Galata müzâfâtından olup kasaba-i Tophâne’de mahalle-i Cihangir sâkinlerinden iken bundan akdem vefât eden Ahmed Ağa b. Mehmed Ağa nâm müteveffânın verâseti zevce-i metrûkesi Âişe bt. Ahmed Ağa nâm hâtuna ve vâlidesi Râbia bt. Mehmed nâm hâtuna ve sulbî sagīr oğlu Mehmed Çelebi’ye ve sulbiye sagīre kızı Fâtıma’ya münhasıra olduğu şer‘an mütebeyyin oldukdan sonra sagīrân-ı mezbûrânın tesviye-i umûrlarına kıbel-i şer‘den mansûbe vasî ve vâlideleri mezbûre Âişe Hâtun’un li ebeveyn karındaşı fahrü’l-emâsil ve’l-akrân Mehmed Ağa b. Ahmed Ağa meclis-i hatîr-i lâzimü’t-tevkīrde müteveffâ-yı mezbûrun li ebeveyn karındaşı olup mahrûse-i Kostantıniyye’de mahalle-i el-Hâc Küçük’de sâkin işbu hâfızü’l-kitâb fahrü’l-a‘yân ve’l-akrân İbrahim Ağa b. Mehmed mahzarında bi’l-vekâle ikrâr ve i‘tirâf edip mahalle-i mezbûre kurbunda vâki‘ bir tarafı Cihangir câmi‘i’nin imâmına vakıf olan menzile ve bir tarafı Rahîkīzâde mülküne ve bir tarafı İskender Evi demekle ma‘rûf menzile ve bir tarafı tarîk-i âm ile mahdûd (…?) bahçesinin eşcâr-ı müsmire ve gayr-ı müsmiresiyle nısf-ı şâyi‘i müteveffâ-yı mezbûrun olup nısf-ı âharı merkūm İbrahim Ağa’nın olmağla müteveffâ-yı mezbûrun zarûret-i deyni için bey‘ olunmak lâzım olmağın bey‘ men yezîd olup rağabât-ı nâs münkatı‘a oldukdan sonra iki sehimi on bin akçede merkūm İbrahim Ağa üzerinde karâr edip ziyâde ile tâlib-i âharı olmamağla nısfını merkūm İbrahim Ağa’ya beş bin nakd-i râyic fi’l-vakt akçeye bey‘-i bâtt-ı sahîh-i şer‘îyle bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan bahçenin nısf-ı âharını sâir emlâki gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm İbrahim Ağa bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Fî [târihi’]l-mezbûr. Şuhûdü’l-hâl: Es-Sâbikūn.