Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 175 Hüküm no: 141 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed Ağa’nın varislerinin muhallefâttan olan evlerdeki hisselerini İbrahim Ağa b. Mehmed Ağa’ya satmaları Mahmiye-i Galata müzâfâtından olup kasaba-i Tophâne’de mahalle-i Cihangir sâkinlerinden iken bundan akdem vefât eden Ahmed Ağa b. Mehmed Ağa nâm müteveffânın verâseti zevce-i metrûkesi Âişe bt. Ahmed Ağa nâm hâtuna ve vâlidesi Râbia bt. Mehmed nâm hâtuna ve sulbî sagīr oğlu Mehmed Çelebi’ye ve sulbiye kızı Fâtıma’ya münhasıra olduğu şer‘an mütebeyyin ve müte‘ayyin oldukdan sonra sagīrân-ı mezbûrânın tesviye-i umûrlarına kıbel-i şer‘den mansûbe vasî ve vâlideleri mezbûre Âişe tarafından husûs-ı âti’l-beyânı bey‘a vekîl olup vekâleti ber nehc-i şer‘î sâbite olan Mehmed Ağa b. Ahmed Ağa meclis-i şer‘-i hatîr-i lâzimü’t-tevkīrde müteveffâ-yı mezbûrun li ebeveyn karındaşı olup mahrûse-i Kostantıniyye’de mahalle-i el-Hâc Küçük’de sâkin fahrü’l-emâsil ve’l-akrân bâ‘isü’l-kitâb İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip müteveffâ-yı mezbûrun muhallefâtından olup mahalle-i mezbûre Cihangir kurbunda vâki‘ bir tarafı yine müteveffâ-yı mezbûrun selâmlık duvarına ve bir tarafı Ferahşad Evi demekle ma‘rûf [41b] müşterek menzile ve bir tarafı tarîk-i âm ile mahdûd olup bir bâb fevkānî tahtânî menzilin önünde yine bir bâb fevkānî ve bir bâb tahtânî oda ve bi’r-i mâ ve iki kenîfi ve eşcâr-ı müsmire ve gayr-ı müsmireyi müştemil menzilin ve yine kurbunda olan bir tarafı merhûm-ı mezbûrun selâmlık duvarına ve bir tarafı menzil-i mezbûra ve bir tarafı Kadı Evi demekle ma‘rûf menzile ve bir tarafı tarîk-i âm ile mahdûd olup bir bâb fevkānî odayı ve kenîfi ve önünde cüneyneyi müştemil menzilin ve yine kurbunda vâki‘ bir tarafı müteveffâ-yı mezbûr mülkü ve bir tarafı menzil-i mezbûr Ferahşad Evi ve bir tarafı tarîk ile mahdûd olup iki bâb tahtânî ve altında ahırı ve önünde tahta-pûşu müştemil menzilin altı sehimden bir sehimi müteveffâ-yı mezbûr Ahmed Ağa’nın olup zarûret-i deyni için bey‘ men yezîd olup rağabât-ı nâs bi’l-külliye münkatı‘a oldukdan sonra küllen üç kıt‘a menzil müşârün-ileyh İbrahim Ağa üzerinde elli iki bin akçede karâr edip ziyâde ile tâlib-i uhrâ olmamağın altı sehimden bir sehimi mezbûr İbrahim Ağa’ya sekiz bin altı yüz altmış altı akçeye vekâletim hasebiyle bey‘-i bâtt-ı sahîh-i şer‘îyle bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan menzilin südüsünü dahi sâir emlâki gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzere cârî kelâmını el-mukarru lehü’l-merkūm İbrahim Ağa vicâhen ve şifâhen tahkīk edicek, mahkeme-i şerîfe küttâbından Abdülkerim Efendi b. Mahmud menâzil-i mezbûrenin üzerine irsâl olunup ol dahi zeyl-i kitâbda mastûrü’l-esâmî olan müslimîn üzerine varıp müşâhade eylediklerinde sâlifü’z-zikr olan üç aded menzilin altı sehimden bir sehimi ancak sekiz bin altı yüz altmış altı akçe eder, hakk-ı karârı meblağ-ı mezbûrdur deyû her biri alâ tarîki’ş-şehâde ihbâr eylediklerini mevlânâ-yı mezbûr mahallinde tahrîr ve gelip mahfil-i kazâda alâ vukū‘ihî haber vermeğin mâ vaka‘a bi’t-taleb ketb olundu. Hurrire fi’l-yevmi’s-sânî aşer min şehri Rebî‘ilevvel li sene isneteyn ve hamsîn ve elf. Şuhûdü’l-hâl: El-Hâc Durak Efendi b. İlyas el-İmâm, el-Hâc Sefer Beşe b. Halil er-Râcil, Süleyman Ağa b. Mehmed Ağa, Solak Mehmed Çelebi eş-şehîr bi Kınalızâde, Abdurrahman Çelebi b. Hüseyin, Handan Bey b. Abdullah, Hasan Efendi b. Mehmed el-İmâm, Mehmed Çelebi b. Yusuf el-Müezzin, Ali Dede b. Abdullah, Mehmed b. İbrahim el-Müezzin, Rıdvan b. Abdullah el-Kayyım.