Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 184 Hüküm no: 154 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Memi b. Murad’ın Derviş Bey b. Murad’ın varislerinden olduğunu isbat etmesi Mahmiye-i Galata tevâbi‘inden olup kasaba-i Kasımpaşa mahallâtından Tahtakadı sâkinlerinden bâ‘isü’l-kitâb Hasan b. Memi b. Murad nâm kimesne meclis-i şer‘-i lâzimü’t-tevkīrde yine mahalle-i mezbûre sükkânından bundan akdem vefât eden Derviş Bey b. Murad nâm müteveffânın verâseti zevce-i metrûke ve vârisesi Revâne bt. Abdullah nâm hâtuna ve sulbiye sagīre kızı Rahime’ye münhasıra olduğu şer‘an mütebeyyin oldukdan sonra sagīre-i merkūmenin tesviye-i umûruna kıbel-i şer‘den mansûbe vasî ve vâlidesi mersûme Revâne mahzarında takrîr-i da‘vâ edip müteveffâ-yı mezbûr Derviş Bey benim babam merkūm Memi’nin li ebeveyn karındaşı olup maskat-ı re’sleri vilâyet-i Rumeli’nde Dukakin kazâsına tâbi‘ Belamin nâm karyeden olup babaları ismi Murad b. Abdullah ve Mihri nâm hâtundan tevellüd edip bu takdîr ben müteveffâ-yı mezbûr Derviş Bey’in li ebeveyn karındaşı oğlu olup usûbet-i nesebiyye cihetinden vârisi olup muhallefâtının sekiz sehimden üç sehimi bana isâbet eylemiş iken mezbûre Revâne benim hakkımı vermede ta‘allül eder, suâl olunup muhallefât-ı mezbûrdan intikāl eden hisse-i şâyi‘am alıverilmesin taleb ederim dedikde gıbbe’s-suâl [ve] akībe’l-inkâr müdde‘î-i mezbûr Hasan’dan da‘vâsına mutâbık beyyine taleb olundukda udûl-i müslimînden olup vilâyet-i mezbûrede ve karye-i mersûme Belamin’den şatır Osman Bey b. Hüseyin ve Hızır Bey b. Süleyman nâm kimesneler li ecli’ş-şehâde meclis-i şer‘a hâzırân olup fi’l-vâki‘ müteveffâ-yı mezbûr Derviş Bey müdde‘î-i mezbûr Hasan’ın babası mezbûr Memi ile li ebeveyn karındaşlar olup babaları ismi Murad b. Abdullah ve anaları ismi Mihri bt. Abdullah’dır, merkūm Hasan müteveffâ-yı mezbûrun li ebeveyn karındaşı Memi’nin oğlu olup usûbet-i nesebiyye cihetinden vârisidir, biz bu husûsa bu vech üzere şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde [44b] şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Hasan’ın verâsetine hüküm birle mâ vaka‘a gıbbe’t-taleb ketb olundu. Cerâ zâlike ve hurrire fi’l-yevmi’s-sâlis aşer min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Umdetü’l-a‘yân Mehmed Kapudân b. Hasan Kapudân, fahrü’l-eimme Hüsam Efendi el-İmâm, Hızır Efendi b. ( ) el-Müezzin, Mehmed Çelebi b. Mustafa, Mehmed Bey b. Ramazan, Kadri Çelebi b. Ali, Gazanfer Çelebi b. Mehmed, Mahmud b. İlyas.