Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 185 Hüküm no: 155 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mahmud Efendi’nin kölesi Rıdvan b. Abdullah’ı hayattayken azat etmiş olduğu İşbu râfi‘ü’l-kitâb uzun boylu gök gözlü Hırvadiyyü’l-asl Rıdvan b. Abdullah nâm kimesne meclis-i şer‘-i hatîr-i lâzimü’t-tevkīrde mahmiye-i Galata’ya tâbi‘ kasaba-i Tophâne’[de] mahalle-i Perizat sâkinlerinden iken bundan akdem vefât eden Mustafa Ağa b. Mahmud Efendi merhûmun sulbî kebîr oğlu İbrahim ve yine sulbiye sagīre kızları Fâtıma ve Hatice’nin tesviye-i umûrlarına kıbel-i şer‘den mansûbe vasî ve vâlideleri Semenzâr bt. Abdullah nâm hâtun tarafından Ali Ağa b. eş-Şeyh Cafer ve Veli Beşe b. Ali nâm kimesneler şehâdetleri ile vekâleti sâbite olan fahrü’l-kuzât Mustafa Efendi b. Receb mahzarlarında takrîr-i da‘vâ edip abd-i memlûkü olduğumuz mezbûr Mustafa Ağa hâl-i hayâtında ve kemâl-i akl-i sıhhatinde beni âzâd eylemiş idi verese-i müteveffâ-yı mezbûrun eydi üzerimden kasr-ı yed olunup ve hâlâ ıtkımı taleb ederim dedikde gıbbe’s-suâl ve akībe’l-inkâr müdde‘î-i mezbûr Rıdvan’dan da‘vâsına muvâfıka beyyine taleb olundukda udûl-i ricâlden Ahmed Çelebi b. Sefer Çavuş ve el-Hâc ( ) Bey b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müdde‘î-i mezbûr Rıdvan’ı müteveffâ-yı merkūm Mustafa Ağa bizim huzûrumuzda hasbeten lillâhi’l-aliyyi’l-azîm ve taleben li merzâti rabbihi’l-kerîm mâlından âzâd eyledi biz bu husûsa bu vech üzere şâhidleriz ve şehâdet dahi ederiz deyû her birileri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Rıdvan’ın ıtkına hüküm birle mâ vaka‘a bi’t-taleb ketb olundu. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: İbrahim Çelebi b. Çakır Bey el-Cündî, Ahmed Çavuş b. Mehmed, Mustafa b. Abdullah, Mahmud b. İlyas, Receb b. Abdullah.