Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 194 Hüküm no: 164 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abaza asıllı Dilaver b. Abdullah’ın azat edilmiş olduğu İşbu râfi‘ü’l-kitâb uzun boylu siyah gözlü açık kaşlı Abaziyyü’l-asl Dilâver b. Abdullah nâm kimesne meclis-i şer‘-i hatîr-i lâzimü’t-tevkīrde mahmiye-i Galata’ya tâbi‘ kasaba-i Kasımpaşa mahallâtından Câmi‘-i Kebîr mahallesinde sâkin iken bundan akdem vefât eden es-Seyyid Ali Çelebi b. es-Seyyid İsmail nâm müteveffânın verâseti kebîr oğlu Mehmed Ağa’ya ve zevce-i metrûkesi Âişe bt. Mustafa Efendi’ye ve sagīr oğlu Hasan Çelebi’ye münhasıra olduğu şer‘an zâhir ve mütebeyyin oldukdan sonra vâris-i mezbûr Mehmed Ağa sagīr-i mezbûrun kıbel-i şer‘den mansûb vasîsi olan Abdi Çelebi nâm kimesneler mahzarlarında takrîr-i da‘vâ edip abd-i memlûkü olduğum müteveffâ-yı mezbûr es-Seyyid Ali Çelebi hâl-i hayâtında ve kemâl-i akl-i sıhhatinde beni mâlından âzâd eylemiş idi, verese-i müteveffâ-yı mezbûrun yedleri üzerimden kasr olunup hâlâ ıtkımı taleb ederim dedikde, gıbbe’s-suâl akībe’l-inkâr müdde‘î-i mezbûr Dilâver’den da‘vâsına muvâfık beyyine taleb olundukda [47b] udûl-i ricâlden Mehmed Çelebi b. İsmail ve Hasan Bey b. İbrahim nâm kimesneler li ecli’ş-şehâde hâzırân bi’l-meclis olup gıbbe’l-istişhâd fi’l-vâki‘ müdde‘î-i mezbûr Dilâver’i müteveffâ-yı mezbûr es-Seyyid Ali Çelebi hâl-i hayâtında bizim huzûrumuzda mâlından âzâd eyledi biz bu husûsa bu vech üzere şâhidleriz ve edâ-i şehâdet dahi ederiz deyû her birleri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra merkūm Dilâver’in ıtkına hüküm birle mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: Ali Çelebi Kâtib-i dîvân-ı âlî, Mehmed Çelebi el-Cündî, Mehmed Çelebi [b.] Ramazan.