Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 197 Hüküm no: 166 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Babaları ölen Sâliha ve Ömer’e nafaka tayini Mahmiye-i Galata mahallâtından Emekyemez mahallesinde sâkin iken bundan akdem vefât eden merhûm Mustafa Beşe [b.] Abdullah nâm müteveffânın sulbiye sagīre kızı Sâliha’nın ve sulbî sagīr oğlu Ömer’in vasiyy-i muhtârı olan es-Seyyid Mahmud Çelebi b. es-Seyyid Mehmed meclis-i şer‘-i şerîfde takrîr-i kelâm edip sagīrân-ı mezbûrânın nafaka ve kisveleri ve sâir havâic-i lâzımeleri için nafaka takdîr olunmasın taleb ederim dedikde, hâkimü’l-muvakki‘i’l-müstetâb sagīrân-ı mezbûrânın babaları müteveffâ-yı mezbûrdan intikāl eden emvâlinden nafaka ve kisveleri ve sâir havâic-i lâzımeleri için târih-i kitâbdan beher yevm dörder akçe nafaka takdîr edip inde’l-ihtiyâc istidâneye ve vakt-i zaferde rücû‘a mezbûr es-Seyyid Mahmud Çelebi’ye izin verilmeğin mâ vaka‘a bi’t-taleb ketb olundu. Cerâ zâlike ve hurrire fi’l-yevmi’s-sânî min şehri Rebî‘ilâhir li sene isneyn ve hamsîn ve elf. Şuhûdü’l-hâl: El-Hâc Süleyman b. Bayram el-İmâm, Mustafa b. Seyfullah, el-Hâc Mehmed b. el-Hâc Yusuf, el-Hâc Osman b. Abdullah, el-Hâc Hüseyin b. Yusuf, el-Hâc Haydar b. Abdullah, Ali Dede b. Abdullah, Mehmed Çelebi b. İsmail, Mahmud b. İlyas, Receb b. Abdullah.