Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 197 Hüküm no: 167 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karısından kalan eve ait yarı hisseyi Mehmed Beşe b. Abdülhalim’in satın aldığı Mahmiye-i Galata tevâbi‘inden kasaba-i Kasımpaşa’da el-Hâc Hüsrev mahallesinde sâkine iken bundan akdem vefât eden Tehneye bt. Abdullah nâm hâtunun zâhirde zevci Mehmed Beşe b. Abdülhalim nâm kimesneden gayrı vâris-i ma‘rûfu olmamağın muhallefâtının nısfı mezbûr Mehmed Beşe’ye ve nısf-ı âharı beytülmâle âid olmağın mahmiye-i mezbûrede beytülmâl-i âmme ve hâssa emîni olan kıdvetü’l-emâcid ve’l-ekârim Ali Ağa b. el-Hâc Mehmed tarafından fahrü’l-akrân Mehmed Çelebi b. İsa nâm kimesne meclis-i şer‘de mezbûr Mehmed Beşe tarafından vekîl olup es-Seyyid Derviş Halîfe b. es-Seyyid Yahya el-İmâm ve Mehmed Halîfe b. Ahmed el-Müezzin şehâdetleri ile vekâleti sâbite olup merkūm Mehmed Beşe’nin li ebeveyn karındaşı bâ‘isü’l-kitâb Mustafa b. Abdülhalim nâm kimesne mahzarında ikrâr ve i‘tirâf edip müteveffât-ı mezbûrenin muhallefâtından olup mahalle-i mezbûrede vâki‘ bir tarafdan Mehmed b. Abdülcelil mülkü ve bir tarafı Hüseyin b. Abdullah mülkü ve bir tarafdan Pîrî b. ( ) mülkü ve bir tarafı tarîk-i âm ile mahdûd iki bâb fevkānî ve bir bâb tahtânî büyûtu ve kenîfi ve eşcâr-ı müsmire ve gayrı müsmireyi müştemil hânenin nısfını vekâletim hasebiyle merkūm Mehmed Beşe’ye beş bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip o dahi iştirâ ve tesellüm eyledikden sonra kabz-ı semen ve teslîm-i müsemmen eyledim dedikde mukırr-ı merkūmun vech-i muharrer üzere cârî olan ikrârını mukarrun lehü’l-mersûm bi’l-muvâcehe tasdîk ve bi’l-müşâfehe tahkīk eyledikde mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî min şehr-i Rebî‘ilâhir li sene isneyn ve hamsîn ve elf. Şuhûdü’l-hâl: El-Hâc Mehmed Beşe b. Murad er-Râcil, Hasan b. Abdülhalim, Ali b. Abdullah el-Münâdî, Mahmud b. İlyas, Receb b. Abdullah ve gayruhüm.