Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 230 Hüküm no: 195 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva Hâtun bt. Kâbil Ağa’nın evin kendisine ait hissesini sattığı Mahrûse-i Kostantıniyye’de Sultan Süleyman -aleyhi’r-rahmeti ve’l-gufrân- binâ eylediği câmi‘-i şerîf kurbunda sâkine seyyidetü’l-muhadderât Havva Hâtun bt. Kābil Ağa tarafından husûs-ı âti’l-beyân bey‘a vekîl olup vekâleti ber nehc-i şer‘î sâbite olan sulbî kebîr oğlu fahrü’l-emâsil ve’l-akrân Mehmed Ağa b. Ahmed Ağa meclis-i şer‘-i hatîr-i lâzimü’t-tevkīrde yine mahrûse-i mezbûrede el-Hâc Küçük mahallesinde sâkin şerîf-i muhterem nûr-ı hadîka-i Resûl-i ekrem fahrü’l-a‘yân ve’l-akrân İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip müvekkile-i mezbûre vâlidem Havva Hâtun’a bundan akdem babası mezbûr Kābil Ağa’dan [57b] intikāl eden mahalle-i mezbûrede vâki‘ Yusuf evi demekle ma‘rûf inde’l-ahâlî ve’l-cîrân ma‘lûmü’l-hudûd olan menzilin altı sehimden bir sehim hisse-i şâyi‘asını vekâletim hasebiyle merkūm İbrahim Ağa’ya bin altı yüz nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i müsemmen-i mahdûd eyledim ba‘de’l-yevm sâlifü’z-zikr olan menzilin bir sehimini dahi keyfe mâ yeşâ’ ve mâ türîd mutasarrıf olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm İbrahim Ağa tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min Cumâdelûlâ li sene isneyn ve hamsîn ve elf. Şuhûdü’l-hâl: Fahrü’l-müderrisîn Receb Efendi b. Bektaş, el-Hâc Receb b. Mahmud, el-Hâc Sefer b. Halil er-Râcil, el-Hâc Durak Efendi b. ( ) el-İmâm, Abdurrahman Bey b. Hüseyin, Osman Ağa b. Ahmed Ağa ve gayruhüm.