Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 230 Hüküm no: 196 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Es-Seyyid Ali Çelebi’nin vefatından önce kölesi Rıdvan’ı vasiyetle azat etmiş olduğu Mahmiye-i Galata tevâbi‘inden kasaba-i Kasımpaşa mahallâtından Câmi‘-i Kebîr mahallesinde sâkin iken bundan akdem vefât eden es-Seyyid Ali Çelebi nâm müteveffânın verâseti zevce-i metrûkesi Âişe Hâtun’a ve sulbî kebîr oğlu es-Seyyid Mehmed Çelebi’ye ve sulbî sagīr oğlu es-Seyyid Hasan Çelebi nâm kimesnelere münhasıra olduğu şer‘an mütebeyyin oldukdan sonra işbu râfi‘ü’l-kitâb orta boylu açık kaşlı koyun ala gözlü Rıdvan b. Abdullah nâm kimesne meclis-i şer‘-i hatîr-i lâzimü’t-tevkīrde sagīr-i mezbûr Hasan Çelebi’ye vasî olan li eb karındaşı es-Seyyid Mehmed Çelebi mahzarında takrîr-i da‘vâ edip abd-i memlûkü olduğum müteveffâ-yı mezbûr es-Seyyid Ali Çelebi hâl-i hayâtında ve kemâl-i akl-i sıhhatinde beni tedbîr-i mutlak ile tedbîr eylemişdi. Merkūm Ali Çelebi civâr-ı rahmet-i Hayy-i Kayyûm’a irtihâl ve intikāl edip sülüs mâlı benim kıymetimi müsâ‘id olmağla cemî‘ mâlından âzâd olmuşundur, suâl olunup mûcebiyle amel olunmasın taleb ederim dedikde, gıbbe’s-suâl ve akībe’l-inkâr müdde‘î-i mezbûr Rıdvan’dan da‘vâsına mutâbık beyyine taleb olundukda udûl-i ricâlden Hasan Ağa b. İbrahim ve Mustafa Beşe b. Hüseyin nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müdde‘î-i mezbûr Rıdvan’ı bizim huzûrumuzda tedbîr-i mutlak ile tedbîr edip hâlâ mezbûr Ali Çelebi vefât etmekle muhallefâtının sülüsü mezbûr Rıdvan’ın kıymetine müsâ‘id olmağla mezbûr Rıdvan müteveffâ-yı merkūmun cemî‘ mâlından âzâd olmuşdur, biz bu husûsa bu vech üzere şâhidleriz şehâdet dahi ederiz deyû her birleri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra mezbûr Rıdvan’ın ıtkına hüküm birle mâ vaka‘a bi’t-taleb ketb olundu. Cerâ zâlike ve hurrire fi’l-yevmi’l-âşir min şehri Cumâdelûlâ li sene isneyn ve hamsîn ve elf. Şuhûdü’l-hâl: Mustafa b. İskender, Ali Çelebi b. Mehmed el-Kâtib, İbrahim Bey b. Mustafa, Memi b. Mustafa, Mehmed Çelebi er-Reis-i sultânî, İbrahim Bey b. Abdullah ve gayruhüm.