Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 62 Hüküm no: 21 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Durhacı’nın şabcı Ömer Bey’e olan borcunu ödemesi Hadîka-i hâssa bostancılarından bâ‘isü’l-kitâb Ömer Bey b. Mustafa mahfil-i kazâda Yusuf b. Durhacı [nâm] kimesne mahzarında üzerine da‘vâ edip mezbûr Yusuf her vakıyyesi beş akçeye olmak [üzere] mukaddemâ üç bin elli vakıyye şab bey‘ ve teslîm ol dahi iştirâ ve tesellüm eyleyip semeni olan cem‘an on beş [bin] iki yüz elli akçeden bin altı yüz akçesine bir bârgir iştirâ ve kabz edip on üç bin altı yüz elli akçesi zimmetinde kalmışdır, hâlâ taleb ederim, suâl olunsun dedikde gıbbe’l-istintak mezbûr Yusuf inkâr ile cevâb verdikde müdde‘î-i mezbûrdan beyyine taleb olundukda udûl-i ricâlden Turgud [b.] Hanefî ve Maden b. Bayram [nâm] kimesneler hâzırân olup fi’l-hakīka mezbûr Yusuf müdde‘î-i merkūm Ömer Bey’e bizim huzûrumuzda her vakıyyesi beşer akçe hesâbınca on beş bin iki yüz elli akçeye üç bin elli vakıyye şab iştirâ ve tesellüm eyledi, biz bu husûsa şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinden sonra mezbûr Yusuf mu‘terif olup fi’l-hakīka hâl minvâl-i muharrer üzere olup zikr olunan üç bin elli vakıyye şabı vakıyyesi beşer akçeye merkūm Ömer Bey’den iştirâ ve kabz eyleyip keçi semeninden bâkī kalan on üç bin altı yüz elli akçeyi mezbûr Ömer Bey emriyle gāib ani’l-meclis olan (...) Bey’in ağası olan Ali Ağa nâm kimesneye def‘ ve teslîm eyleyip zimmetimde bir habbe bâkī kalmamışdır dedikde mezbûr Ömer Bey istintak olundukda inkâr ile mukābele etmeğin mezbûr Yusuf’dan def‘-i mersûma beyyine taleb [olundukda] ityân-ı beyyineden ızhâr-ı acz ve istihlâf etmekle mezbûr Ömer Bey vech-i muharrer üzere zikr olunan şab akçesi on beş bin iki yüz elli akçeden bin altı yüz akçesini bârgir semeniyle istîfâ edip bâkī on üç bin iki yüz elli akçemi gāib-i mezbûra def‘ ve teslîm eyle deyü mezbûr Yusuf’a emreylemediğine yemîn teklîf olundukda [alâ] vefkı’l-mesûl half bi’llâhi’l-azîm etmeğin mûcebiyle meblağ-ı mezbûrun edâsına tenbîh-birle mâ-vaka‘a kayd şüd. Fî-6 Cumâdelâhire sene 1063. Şuhûdü’l-hâl: Es-Seyyid Mehmed Efendi b. Ali, İmâmzâde Şeyh Mehmed Çelebi, Hasan Çelebi b. Kaymaz, Mahmud b. Şa‘ban, İbrahim Çelebi b. Davud, Hasan Beşe b. Abdullah, Mehmed b. Süleyman Çukadâr, Rıdvan Beşe b. Abdullah ve gayruhum mine’l-huzzâr.