Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 63 Hüküm no: 22 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun ile el-Hâc Mustafa ve Mehmed Çelebi’nin kiraladıkları dükkân ve mahzen aralarındaki tahta perdenin ortak malları olduğu Mahmiye-i İstanbul hısnı ebvâbından Zindânkapısı hâricinde vâki‘ Rüstempaşa Evkāfı’ndan bir dükkân ve Mehmed Ağa Evkāfı’ndan bir mahzene icâre-i mu‘accele ve müeccele ile hâlâ mutasarrıf olup mahmiye-i İstanbul’da Üskübî Mahallesi’nde sâkine Fâtıma Hatun bt. Halil Çelebi tarafından husûs-ı âti’z-zikre vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mehmed Beşe b. Hüseyin ve Muharrem Beşe b. Mustafa şehâdetleriyle şer‘an sâbit olan Mehmed Bey b. Ahmed ve yine mevzi‘-i mezbûrda vâki‘ merhûm Ahi Çelebi Evkāfı’ndan icâre-i mu‘accele ve müeccele ile bir dükkân ve bir mahzene iştirâk-i sevy üzere mutasarrıfân olan el-Hâc Mustafa b. el-Hâc Bali ve Mehmed Çelebi b. Ahmed el-yesârî nâm kimesneler mahfil-i kazâda hâzirûn olub her biri âharın mahzarında ikrâr ve takrîr-i kelâm edip vech-i muharrer üzere tasarrufumuzda olan mârru’z--zikr dükkânların ve nahzenlerin mâbeynlerinde izn-i mütevellî ile beş direk üzerinde ihdâs olunan tahta perdenin nısfını müvekkile-i mezbûre Fâtıma Hatun ve nısf-ı âharını dahi merkūmân el-Hâc Mustafa ve Mehmed Çelebi binâ etmekle zikr olunan perde müstakil birimizin olmayıp müşterek olmağla vâki‘-i hüccet-i şer‘iyye olunmak iltimâs ederiz dediklerinde mukırrûn-ı mezbûrûndan herbiri âharın kelâmını tasdîk ettikden sonra mâ-vaka‘a bi’t-taleb ketb olundu. Hurrire fi’s-sâlis ve’l-ışrîn li-sene selâse ve sittin ve elf. Şuhûdü’l-hâl: el-Hâc Mustafa b. Şa‘ban, Himmet Beşe b. Ahmed, el-Hâc Mustafa b. Ahmed, Mahmud Beşe b. Şa‘ban ve gayruhum.