Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 239 Hüküm no: 205 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yelkenci Piyâle Reis’in Ahmed Beşe b. Şaban’ın mirasçılarından alacağını tahsil etmesi Mahmiye-i Galata’da yelkenci tâifesinden işbu râfi‘ü’l-kitâb Piyâle Reis b. Abdullah nâm kimesne mahmiye-i mezbûra muttasıl Kalafatyeri demekle ma‘rûfe iskelede bundan akdem vefât eden Ahmed Beşe b. Şaban nâm müteveffânın evlâd-ı sıgārı Osman ve Selim nâm sagīrlere ve sulbiye kızları Fâtıma ve Âişe ve Emine nâm sagīrelere tesviye-i umûrlarına vasiyy-i muhtâr olup ve yine iskele-i mezbûrede müteveffâ-yı mezbûrun li ebeveyn karındaşı olup vefât eden İsmail Beşe’nin sulbî sagīr oğlu Ali’nin kıbel-i şer‘den tesviye-i umûruna mansûb vasî olan Osman Beşe b. Süleyman Efendi nâm kimesneyi meclis-i şer‘a ihzâr ve mahzarında takdîr-i da‘vâ edip târih-i kitâbdan bir ay mukaddem mezbûrân Ahmed Beşe ve İsmail Beşe’ye yelken bezi bahâsından altı bin iki yüz akçe hakkım olup kable’l-edâ vefât etmekle zimmetlerinden bâkī kalmışdır suâl olunup terekesinden alıverilmesin taleb ederim dedikde gıbbe’s-suâl akībe’l-inkâr müdde‘î-i mezbûr Piyâle Reis’den da‘vâsına mutâbık beyyine taleb olundukda udûl-i ricâlden Mahmud Çelebi b. Abdullah ve el-Hâc Süleyman b. Abdullah nâm kimesneler li ecli’ş-şehâde meclis-i şer‘a hâzırân olup fi’l-vâki‘ müteveffâ-yı mezbûr Ahmed Beşe ve İsmail Beşe hâl-i hayâtında ve kemâl-i sıhhatlerinde târih-i kitâbdan bir ay mukaddem bizim huzûrumuzda ikrâr edip merkūm Piyâle Reis’e yelken bezi bahâsından altmış bin iki yüz akçe vâcibü’l-edâ ve lâzimü’l-kazâ deynimiz vardır deyû ikrâr eylediler biz bu husûsa bu vech üzere şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra mezbûr Piyâle Reis’e meblağ-ı mezbûru ba‘zan ve küllen müteveffâ-yı mezbûrân Ahmed Beşe ve İsmail Beşe’den veya vekîlleri veya resûlleri yedlerinden almadığına veya mukābelesinde rehin veya âhara havâle veya bi vechin mine’l-vücûh zimmetlerin ibrâ eylediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin zikr olunan altı bin iki yüz akçeyi edâya tenbîh birle mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşere min Cumâdelâhire li sene isneteyn ve hamsîn ve elf. Şuhûdü’l-hâl: El-Hâc Hasan b. Abdullah, Mehmed Çelebi b. Ramazan, Hasan Çelebi b. Abdullah, Mahmud b. İlyas ve gayruhüm.