Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 238 Hüküm no: 204 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Şaban’ın şaykadaki hissesine müdahale edilmemesi Vilâyet-i Anadolu’da Gönye sancağından olup Atina kazâsına tâbi‘ Anidas nâm karye sâkinlerinden işbu râfi‘ü’l-kitâb Hasan b. Şaban nâm kimesne mahfil-i kazâda mahmiye-i Galata kurbunda vâki‘ Kalafatyeri demekle ma‘rûf iskelede bundan akdem vefât eden Ahmed b. Şaban nâm müteveffânın sulbî oğulları Osman ve Selim nâm sagīrlere ve sulbiye kızları Fâtıma ve Âişe ve Emine nâm sagīrelerin vasiyy-i muhtârı olup ve yine iskele-i mezbûrede bundan akdem vefât eden müteveffâ-yı mezbûrun li ebeveyn karındaşı İsmail nâm râcilin sulbî sagīr oğlu Ali’nin tesviye-i umûruna kıbel-i şer‘den mansûb vasîsi olan Osman Beşe nâm kimesne mahzarında takrîr-i da‘vâ edip ben merkūmân-ı mezbûrân Ahmed ve İsmail’in li eb karındaşı olup târih-i kitâbdan sekiz ay mukaddem Balıklağı nâm mevzi‘de üçümüz babamız müteveffâ-yı mezbûrdan intikāl eden emvâl-i mevrûsemizden ale’s-seviyye şirket üzere yirmi altı arşın şayka ta‘bîr olunur sefîne binâ edip sefîne-i mezbûre ile mahmiye-i mezbûreye geldikde mezbûrân Ahmed ve İsmail vefât edip sefîne-i mezbûrenin üç sehimden bir sehimi benim mülküm olup ve iki sehimi mezbûrân Ahmed Beşe ve İsmail’in mülkü iken vasiyy-i mezbûr benim hisse-i şâyi‘ama müdâhale eder, suâl olunup hissem alıverilmek matlûbumdur dedikde, gıbbe’s-suâl akībe’l-inkâr müdde‘î-i mezbûr Hasan’dan da‘vâsına mutâbık beyyine taleb olundukda udûl-i ricâlden Kurd Beşe b. Mustafa ve Ömer Beşe b. Kurd ve Murad Beşe b. Ahmed nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ mezbûrûn Ahmed Beşe ve İsmail ve Hasan zikr olunan şaykayı ale’s-seviyye üç hisse olmak üzere babaları müteveffâ-yı mezbûr Şaban’dan intikāl eden mâl-ı mevrûselerinden binâ edip sâlifü’z-zikr sefînenin üç sehimden bir sehimi mezbûr Hasan’ın mülküdür biz bu husûsa bu vech üzere şâhidleriz ve edâ-i [60a] şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın müdde‘î-i mezbûr Hasan şayka-i mezbûrenin sülüs kıymetini mezbûrân Ahmed ve İsmail’den veya vekîlleri veya resûlleri yedlerinden almadığına veya hibe veya âhara havâle ve bi vechin mine’l-vücûh zimmetlerini ibrâ eylediğine yemîn teklîf olundukda alâ vefki’l-mes’ûl yemîn billâhi’l-aliyyi’l-azîm eylemeğin mâ vaka‘a bi’t-taleb ketb ve imlâ olundu. Tahrîren fi’l-yevmi’l-âşir min şehri Cumâdelâhire li sene isneyn ve hamsîn ve elf. Şuhûdü’l-hâl: Es-Sâbikūn.