Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 268 Hüküm no: 229 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Fâtıma bt. İsmail’in mallarının varisleri arasında paylaşıldığı Mahmiye-i Galata’ya tâbi‘ kasaba-i Tophâne mahallâtından el-Hâc Memi mahallesinde sâkine iken bundan akdem vefât eden Fâtıma bt. İsmail Ağa nâm hâtunun verâseti vâlidesi Gevher nâm Hâtun’a ve kız karındaşları Âişe ve Ümmühâni nâm hâtunlara münhasıra olduğu şer‘an mütehakkik oldukdan sonra mezbûre Ümmühâni Hâtun’un tesviye-i umûruna kıbel-i şer‘den mansûbe vasîsi olan merkūme Gevher Hâtun meclis-i şer‘-i hatîr-i lâzimü’t-tevkīrde yine merkūme Ümmühâni Hâtun’un tesviye-i umûruna kıbel-i şer‘îden mansûb nâzır olup muhallefâtına vâzı‘ü’l-yed olan işbu hâfızü’l-kitâb Hasan Bey b. Abdullah nâm kimesne mahzarında ikrâr ve i‘tirâf edip kızım müteveffât-ı merkūme Fâtıma Hâtun’dan irs-i şer‘ile kendime intikāl eden altı bin yedi yüz kırk akçe hisse-i şâyi‘amı ve mezbûre Ümmühâni Hâtun’a isâbet eden on üç bin dört yüz dokuz akçe hisse-i şâyi‘asını vesâyetim hasebiyle mezbûr Hasan Ağa yedinden bi’t-tamâm ve’l-kemâl ahz ve kabz edip zimmetini min külli’l-vücûh ibrâ ve iskāt eyledim ba‘de’l-yevm husûs-ı mezbûra müte‘allika benden da‘vâ ve nizâ‘ sâdıra olursa lede’l-hükkâmi’l-kirâm makbûle ve mesmû‘a olmasın dedikde mukırra-i merkūme Gevher Hâtun’un vech-i muharrer üzere cârî olan ikrârını el-mukarru lehü’l-merkūm Hasan Ağa bi’l-muvâcehe tasdîk ve bi’l-müşâfehe tahkīk edicek mâ vaka‘a’l-vâki‘ bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li sene isneyn ve hamsîn ve elf. Şuhûdü’l-hâl: Hâfız Yusuf Çelebi, Ramazan Efendi, Mahmud b. İlyas, Mehmed Çelebi b. Yusuf.