Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 268 Hüküm no: 228 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. Mehmed’in malından vefatından önce vasiyet ettiği kısma müdahale edilmemesi Mahmiye-i Galata’ya tâbi‘ kasaba-i Tophâne mahallâtından Firuz Ağa mahallesi sâkinlerinden işbu râfi‘ü’l-kitâb fahrü’l-emâsil ve’l-ekârim Mehmed Ağa b. Ali Ağa yine Tophâne mahallâtından Cihangir mahallesinde sâkine iken bundan akdem vefât eden Râbia Hâtun bt. Mehmed nâm müteveffâtın verâseti Emine ve li ebeveyn ah-i kebîri Hüseyin Ağa’ya ve li ebeveyn ahavât-ı kebîreleri Âişe ve İsmihan ve Hatice ve Ümmühân hâtunlara münhasıra olduğu şer‘an mütehakkik oldukdan sonra mezbûrûn mahzarlarında takrîr-i kelâm ve ta‘bîr ani’l-merâm edip müteveffât-ı mezbûre maraz-ı mevtinde sülüs mâlından eczâ-i şerîf tilâveti için iki yüz riyâlî guruş ve techîz [ve] tekfînine on bin akçe ve eyyâm-ı mu‘tâdede ta‘âm tabhına dahi on bin akçe vasiyyet ve beni tenfîze vasiyy-i muhtâr eyledi suâl olunup mûcebiyle amel olunması matlûbumdur dedikde, gıbbe’s-suâl ve akībe’l-inkâr müdde‘î-i mezbûr Mehmed Ağa’dan da‘vâsına mutâbık beyyine taleb olundukda udûl-i ricâlden fahrü’l-akrân Hüseyin Efendi b. İslâm ve Mustafa Efendi b. Mehmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müteveffât-ı merkūme maraz-ı mevtinde meblağ-ı mezbûru sülüs mâlından zikr olunan üzere vasiyyet ve mezbûr Mehmed Ağa’yı tenfîze vasiyy-i muhtâr ve bizi dahi işhâd eyledi biz bu husûsa bu vech üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Mehmed Ağa’nın vasiyy-i muhtârın yedine teslîm birle mâ vaka‘a bi’t-taleb ketb olundu. Cerâ zâlike ve hurrire fi’l-yevmi’l-hâmis aşer min şehri Ramazâni’l-mübârek sene isneyn ve hamsîn ve elf. Şuhûdü’l-hâl: Fahrü’l-kuzât Ramazan Efendi b. Mustafa, fahrü’l-akrân Cafer Ağa b. Süleyman, Ali Ağa b. Yunus, Mehmed Ağa b. Abdullah, Hasan Ağa b. Bayezid?.