Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 274 Hüküm no: 235 Orijinal metin no: [68b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Beşe b. Cafer’in câriyesi Gülistan’ı vasiyet yoluyla azat etmesi İşbu râfi‘atü’l-kitâb uzun boylu açık kaşlı ve sağ elinde eser-i cerâhati olan Rûsiyyetü’l-asl Gülistan bt. Abdullah nâm hâtun mahfil-i kazâda mahmiye-i Galata dâhilinde Alaca Mescid mahalle[si] sâkinlerinden iken bundan [akdem] vefât eden Rıdvan Beşe b. Cafer nâm kimesnenin sulbî sagīr oğlu Mehmed Çelebi’nin vasiyy-i muhtârı olan Ali Beşe b. Cafer nâm kimesne mahzarında takrîr-i da‘vâ edip câriye-i memlûkesi olduğum müteveffâ-yı merkūm Rıdvan Beşe hâl-i hayâtında kemâl-i akl-i sıhhatinde beni tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a intikāl edip sülüs-i mâlı dahi benim kıymetime müsâ‘id olmağla ben cemî‘ mâlından âzâd olunmuşumdur suâl olunup mûcebiyle amel olunmak taleb ederim dedikde gıbbe’s-suâl ve akībe’l-inkâr müdde‘iye-i mezbûreden da‘vâsına mutâbık beyyine taleb olundukda udûl-i ricâlden fahrü’l-eimme Hızır Efendi b. Receb ve el-Hâc Ali b. Mehmed nâm kimesneler li ecli’ş-şehâde meclis-i şer‘a hâzırân olunup gıbbe’l-istişhâd fi’l-hakīka müteveffâ-yı merkūm Rıdvan Beşe hâl-i hayâtında ve kemâl-i sıhhatinde [69a] müdde‘iye-i mezbûre Gülistan’ı bizim huzûrumuzda tedbîr-i mutlak ile tedbîr edip hâlâ merkūm Rıdvan civâr-ı rahmet-i Hayy-i Kayyûm’a irtihâl ve intikāl edip müteveffâ-yı mezbûrun sülüs-i mâlı merkūme Gülistan’ın kıymetine dahi müsâ‘id olup cemî‘ mâlından âzâd olmuşdur biz bu husûsa bu vech üzere şâhidleriz şehâdet dahi ederiz dediklerinde şehâdetleri hayyiz-i kabûlde vâkı‘a olmağın mezbûre Gülistan’ın ıtkına hüküm birle vaka‘a bi’t-taleb ketb olundu. Cerâ zâlike ve hurrire fi’l-yevmi gurreti Zilka‘de sene isneyn ve hamsîn ve elf. Şuhûdü’l-hâl: Mustafa b. Mehmed, Hasan b. İbrahim, Mehmed b. Abdullah, Ali Çelebi b. Ali, Ali b. Hüseyin ve gayruhüm mine’l-huzzâr