Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 275 Hüküm no: 236 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Beşe b. Abdullah’ın câriyesi Yasemin’i vasiyet yoluyla azat etmesi İşbu orta boylu açık kaşlı sağ gözü üzerinde eser-i cerâhati olan Rûsiyyetü’l-asl râfi‘atü’l-kitâb Yasemin bt. Abdullah nâm hâtun mahfil-i kazâda mahmiye-i Galata dâhilinde Alaca Mescid mahallesi sâkinlerinden iken bundan akdem vefât eden Rıdvan Beşe b. Abdullah nâm kimesnenin sulbî sagīr oğlu Mehmed Çelebi’nin vasiyy-i muhtârı olan Ali Beşe b. Cafer nâm kimesne mahzarında takrîr-i kelâm edip câriye-i memlûkesi olduğum müteveffâ-yı merkūm Rıdvan Beşe hâl-i hayâtında ve kemâl-i akl-i sıhhatinde beni tedbîr-i mutlak ile tedbîr edip ve hâlâ civâr-ı rahmet-i kayyûma intikāl ve irtihâl edip sülüs-i mâlı dahi benim kıymetime müsâ‘id olmağla ben cemî‘ mâlından âzâd olmuşumdur suâl olunup mûcebiyle amel olunmasın taleb ederim dedikde gıbbe’s-suâl ve akībe’l-inkâr müdde‘iye-i mezbûreden da‘vâsına mutâbık beyyine taleb olundukda udûl-i ricâlden fahrü’l-eimme Hızır Efendi b. Receb ve el-Hâc Ali b. Mehmed nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka müteveffâ-yı merkūm Rıdvan Beşe hâl-i hayâtında ve kemâl-i sıhhatinde müdde‘iye-i mezbûre Yasemin’i bizim huzûrumuzda tedbîr-i mutlak ile tedbîr edip ve hâlâ merkūm Rıdvan Beşe civâr-ı rahmet-i Hayy-i Kayyûm’a irtihâl edip müteveffâ-yı mezbûrun sülüs-i mâlı dahi merkūme Yasemin’in kıymetine müsâ‘id olup cemî‘ mâlından âzâd olmuşdur biz bu husûsa bu vech üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a olmağın mezbûre Yasemin’in ıtkına hüküm birle mâ vaka‘a bi’t-taleb ketb olundu, Cerâ zâlike ve hurrire fî gurreti Zilka‘de li sene isneyn ve hamsîn ve elf. Şuhûdü’l-hâl: Mustafa b. Mehmed, Hasan b. İbrahim, Mehmed b. Abdullah, Ali Çelebi b. Ali, Ali b. Hüseyin, Hüseyin b. Receb.