Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 291 Hüküm no: 249 Orijinal metin no: [72b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın azat edilmiş olduğu İşbu râfi‘ü’l-kitâb uzun boylu yassı burunlu ve sağ yanında eser-i cerâhati olan A‘râbiyyü’l-asl Hasan [b.] Abdullah nâm kimesne mahmiye-i Galata’ya tâbi‘ kasaba-i Kasımpaşa mahallâtından Yeldeğirmeni mahallesi sâkinlerinden iken bundan akdem vefât eden İnâyet Bey b. ( ) nâm müteveffânın sulbî sagīr oğulları Mehmed ve Mustafa’ya mansûb vasî olan Ümmühân Hâtun’u meclis-i şer‘a ihzâr ve mahzarında takrîr-i da‘vâ edip abd-i memlûkü olduğum müteveffâ-yı mezbûr İnâyet Bey’in hâl-i hayâtında ve kemâl-i akl-i sıhhatinde beni tedbîr-i mutlak ile tedbîr eylemişdi. Hâlâ mezbûr İnâyet Bey civâr-ı rahmet-i Hayy-i Kayyûm’a irtihâl ve intikāl edip sülüs-i mâlı benim kıymetimi müsâ‘id olmağla cemî‘ mâlından âzâd olmuşumdur, suâl olunup mûcebiyle amel olunması matlûbumdur dedikde, gıbbe’s-suâl ve akībe’l-inkâr müdde‘î-i mezbûr Hasan’dan da‘vâsını mübeyyin beyyine taleb olundukda udûl-i ricâlden Hüseyin Efendi b. Abdülkerim ve Mehmed b. İbrahim nâm kimesneler li ecli’ş-şehâde meclis-i şer‘a hâzırân olup fi’l-hakīka müdde‘î-i mezbûr Hasan’ı müteveffâ-yı merkūm İnâyet Bey bizim huzûrumuzda tedbîr-i mutlak ile tedbîr edip hâlâ merkūm İnâyet Bey vefât etmekle muhallefâtının sülüsü mezbûr Hasan’ın kıymetine müsâ‘id olmağla müdde‘î-i mezbûr müteveffâ-yı merkūmun cemî‘ mâlından âzâd olmuşdur, biz bu husûsa bu vech üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘î-i mezbûr Hasan’ın ıtkına hüküm birle mâ hüve’l-vâki‘ li ecli’l-vesîka ketb ve yed-i tâlibe vaz‘ ve def‘ olundu. Cerâ zâlike ve hurrire fi’l-yevmi’r-râbi‘ aşer min Muharremi’l-harâm li sene selâse ve hamsîn ve elf. Şuhûdü’l-hâl: Ramazan Efendi b. Mustafa el-Kadı, Borazan b. Mustafa, Musli Ağa b. Mehmed, Mahmud b. İlyas el-Haddâm, Mehmed Çelebi el-Haddâm.