Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 291 Hüküm no: 248 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hâtun bt. Abdullah’ın terekesinden beytülmâle ait kısmın alındığı Mahmiye-i Galata’ya tâbi‘ kasaba-i Tophâne mahallâtından el-Hâc Memi mahallesinde sâkin iken bundan akdem vefât eden Kamer Hâtun bt. Abdullah’ın verâseti zevci Hasan Bey b. Hamza ile beytülmâle münhasıra olduğu şer‘an mütehakkik oldukdan sonra mahmiye-i mezbûrede beytülmâl-i âmme ve hâssa emîn olan fahrü’l-emâsil ve’l-akrân Ali Ağa b. el-Hâc Mehmed tarafından vekîl olup ber nehc-i şer‘î vekâleti sâbite olan Mehmed Ağa b. Abdülmennân meclis-i şer‘-i hatîr-i lâzimü’t-tevkīrde müteveffât-ı mezbûrenin zevci mezbûr Hasan Bey b. Hamza tarafından husûs-ı âti’l-beyânı tasdîka vekîl olup vekâleti ber nehc-i şer‘î Hüdâverdi b. Mehmed ve Zülfikār Beşe b. Abdullah nâm kimesneler şehâdetleri ile sâbite olan Mehmed b. Abdülmümin nâm kimesne mahzarında bi’t-tav‘i’s-sâf ikrâr ve i‘tirâf eyleyip müteveffât-ı mezbûre Kamer Hâtun’un terekesinden olan mülk menzilden ve esâs-ı beyt olan menkūlâtdan beytülmâle âid ve râci‘ olan nısf hisse-i şer‘iyyeyi vekâletim hasebiyle bi’t-tamâm ve’l-kemâl ahz ve kabz eyledim min ba‘d merkūme Kamer Hâtun’un muhallefâtından mezbûr Hasan Bey’in zimmetinde bir akçe ve bir habbe hakkım kalmadı dedikde [72b] mukırr-ı mezbûr Mehmed Ağa b. Abdülmennân’ın vech-i muharrer üzere cârî ve sâdır olan ikrârını vekîli mezbûr Mehmed Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve yed-i râgıba vaz‘ ve def‘ olundu. Tahrîren fi’l-yevmi’l-âşir min Muharremi’l-harâm li sene selâse ve hamsîn ve elf. Şuhûdü’l-hâl: Mustafa Bey b. Abdullah, Mustafa Çelebi b. Mehmed, Ahmed Çelebi b. Mehmed, Hüseyin b. Ömer Bezistânî, Ramazan Efendi b. Mustafa, Mahmud b. İlyas, Mehmed Çelebi el-Haddâm, Musa Hoca b. Veli, Hüseyin Beşe b. Abdullah.