Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 303 Hüküm no: 262 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Haydar b. Abdullah’ın Mustafa Beşe b. Abdullah’daki alacağını varislerinden aldığı Mahmiye-i Galata’da Câmi‘-i Kebîr mahallesi sükkânından el-Hâc Haydar b. Abdullah nâm kimesne meclis-i şer‘-i hatîr-i lâzimü’t-tevkīrde mahmiye-i merkūmede Emekyemez mahallesinde sâkin iken bundan akdem vefât eden Mustafa Beşe b. Abdullah nâm râcilin sulbî oğlu Ömer ve sulbiye kızı Sâliha nâm sâgīrelere vasiyy-i muhtâr [75b] olan işbu râfi‘ü’l-kitâb es-Seyyid Mahmud Çelebi b. es-Seyyid Mehmed mahzarında ikrâr-ı tâm ve takrîr-i kelâm edip müteveffâ-yı mezbûr zimmetinde cihet-i karz-ı şer‘îden dört yüz kıt‘a riyâlî guruş hakk-ı müsbetim olup kable’l-edâ vefât etmeğin zimmetinde kalmışdı, el-hâletü hâzihî meblağ-ı mersûm dört yüz kıt‘a riyâlî guruşu müteveffâ-yı merkūmun muhallefâtına vaz‘-ı yed ettiği hasebiyle vasiyy-i mezbûr yedinden bi’t-tamâm ve’l-kemâl ahz ve kabz eyledim min ba‘d zimmetinde bir akçe ve bir habbe hakkım kalmadı ba‘de’l-yevm husûs-ı merkūma müte‘allik benden bi’z-zât ve bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı merkūm el-Hâc Haydar’ın ber vech-i meşrûh cârî olan ikrârın el-mukarru lehü’l-merkūm es-Seyyid Mahmud Çelebi vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’s-sâlis min şehri Rebî‘ilâhir li sene selâse ve hamsîn ve elf. Şuhûdü’l-hâl: Ali Çelebi b. Mansur, Emrullah Bey b. Kemal el-Bevvâb, el-Hâc Mehmed b. Yusuf el-Müezzin, es-Seyyid Mehmed Çelebi b. es-Seyyid Mehmed, el-Hâc Mehmed b. Şemsi ve gayruhüm.