Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 311 Hüküm no: 269 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Yusuf’un hayattayken kocasına mehrini hibe ettiği Mahmiye-i Galata’ya tâbi‘ kasaba-i Beşiktaş’da Cihannümâ mahallesinde sâkin iken bundan akdem vefât eden Âişe bt. Yusuf nâm hâtunun verâseti zevc-i metrûkü Pîr Mehmed Bey b. Receb ile sadrî sagīr oğlu Mehmed’e münhasıra olduğu şer‘an zâhir ve mütehakkik oldukdan sonra sagīr-i mezbûrun vasiyy-i mansûbu olan Mehmed Bey b. Şaban nâm kimesne meclis-i şer‘-i şerîfde müteveffât-ı mersûmenin zevci işbu râfi‘ü’l-kitâb merkūm Pîr Mehmed Bey mahzarında bi’l-vesâye üzerine da‘vâ ve takrîr-i kelâm edip müteveffât-ı merkūmenin mezbûr Pîr Mehmed Bey zimmetinde mütekarrir olup revâc-ı kâsib? olan on beş bin akçe mehr-i müeccelinin selâse-i erbâ‘ı bi hasebi’l-irsi’ş-şer‘î sagīr-i mersûma isâbet etmeğin vesâyetim hasebiyle mezbûrdan taleb ederim suâl olunup alıverilmek murâdımdır dedikde, gıbbe’s-suâl mezbûr Pîr Mehmed Bey cevâbında müteveffât-ı mersûme zimmetinde olan on beş bin mezbûrü’n-na‘t akçe mehr-i müecceli hâl-i hayâtında ve kemâl-i sıhhatinde bana hibe-i sahîha-i şer‘iyye ile hibe ve temlîk ben dahi meclis-i hibede ittihâb ve kabûl eyledim deyû def‘ ile mukābele edicek gıbbe’l-istintâk ve akībe’l-inkâr mezbûr Pîr Mehmed Bey’den müdde‘âsını mübeyyine beyyine taleb olundukda udûl-i müslimînden Ahmed Çelebi b. Abdülkerim ve Safiye Hâtun bt. Abdullah ve Ceyhun bt. Abdullah nâm kimesneler li ecli’ş-şehâde meclis-i şer‘a hâzırûn olup isre’l-istişhâdü’ş-şer‘î fi’l-vâki‘ müteveffât-ı mezbûre hâl-i hayâtında ve kemâl-i sıhhatinde zevci mersûm Pîr Mehmed Bey’in zimmetinde mütekarrir olan on beş bin mezbûrü’n-na‘t akçe mehr-i müeccelini bizim huzûrumuzda mezbûra hibe-i sahîha-i şer‘iyye ile hibe ve temlîk ol dahi meclis-i hibede ittihâb ve temellük ve kabûl eyledi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyetihî şerâiti’l-kabûl şehâdetleri makbûl olmağın mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min Cumâdelûlâ li sene selâse ve hamsîn ve elf. Şuhûdü’l-hâl: Abdülkerim Efendi b. Yahya el-İmâm, Mehmed Halîfe b. Sun‘ullah el-Müezzin, Ahmed Bey b. Cafer, Hasan Çelebi b. Yusuf, Ahmed Çelebi b. Mehmed, Abdi Bey b. ( ) el-Cündî, Mehmed Çelebi b. Ramazan, Mahmud b. İlyas ve gayruhüm.