Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 311 Hüküm no: 270 Orijinal metin no: [77a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Ahmed b. Hasan’ın varislerinin bazı malların satılmasından doğan haklarını aldıkları Mahmiye-i Galata’da Şehsuvar mahallesinde sâkin iken bundan akdem vefât eden el-Hâc Ahmed b. Hasan nâm râcilin verâseti zevce-i metrûkesi Fâtıma bt. Osman ile sulbî kebîr oğlu Mehmed Çelebi ve sulbiye kebîre [kızı] Sultan ve sulbiye sagīre kızı Gevher Hân’a münhasıra olduğu şer‘an zâhir ve mütehakkik oldukdan sonra mezbûre Fâtıma Hâtun kendi tarafından asâleten ve sagīre-i mersûme tarafından vasiyy-i mansûbesi olmağla vesâyeten ve merkūmân Mehmed Çelebi ve Sultan dahi asâleten meclis-i şer‘de işbu râfi‘ü’l-Kitâb el-Hâc Rıdvan b. Abdullah nâm kimesne mahzarında her biri ikrâr ve takrîr-i kelâm edip müteveffâ-yı mezbûrun muhallefâtından olup bi tarîki’l-irsi’ş-şer‘î bize intikāl eden ma‘lûmü’l-kadr keten ve pirinç ve şekeri bey‘a ve kabz-ı semene ve bize îsâle merkūm el-Hâc Rıdvan’ı tarafımızdan vekîl ve menâbımıza nâib nasb ve ta‘yîn edip ol dahi vekâlet-i mersûmeyi kabûl eyledikden sonra eşyâ-i merkūmeden beş bin yüz elli Vakıyye keteni elli beş bin iki yüz yetmiş bir akçeye ve beş yüz elli buçuk keyl pirinci yirmi yedi bin sekiz yüz seksen iki akçeye ve yüz altmış dokuz Vakıyye şekeri dahi beş bin üç yüz seksen akçeye cem‘an seksen sekiz bin beş yüz otuz üç akçeye vekâlet-i mahkiyesi hasebiyle bey‘ edip semenlerini kabz etmişdi. Hâlâ meblağ-ı mezbûrun on altı bin üç yüz akçesini müteveffâ-yı mezbûrun eşyâ-i merkūme gümrüğü ve ücret-i sefîne ve hammâliyyesine olan düyûn-ı müsbetesi ashâbına bizim emrimiz ile def‘ ve teslîm edip meblağ-ı bâkī yetmiş iki bin iki yüz [77b] on altı akçeyi merkūm el-Hâc Rıdvan yedinden bi’t-tamâm ve’l-kemâl ahz ve kabz eyledik min ba‘d zikr olunan eşyâ semeninden zimmetinde bir akçe ve bir habbe hakkımız kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fî evâhiri Cumâdelûlâ li sene selâse ve hamsîn ve elf. Şuhûdü’l-hâl: Mustafa Çelebi b. Ramazan, el-Hâc Ali b. Mustafa, Osman Beşe b. Abdullah, el-Hâc İbrahim b. Bayram, İbrahim b. Halil, el-Hâc Ali b. Kasım el-Haffâf, Ahmed Beşe b. Ali er-Râcil, Abdülkerim Beşe b. Yahya er-Râcil, Ali Çelebi b. Şükrullah, Hasan b. İbrahim, Piyâle b. Abdullah.