Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 330 Hüküm no: 283 Orijinal metin no: [81a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi’nin İsmail Çelebi b. Hüseyin’in varislerine hakkını vermesi Mahmiye-i Galata’ya tâbi‘ kasaba-i Kasımpaşa mahallâtından Sirkeci mahallesinde sâkin iken vefât eden İsmail Çelebi b. Hüseyin nâm kimesnenin verâseti zevce-i metrûkesi İsmihan bt. Mahmud nâm hâtun ve vâlidesi Sâime bt. Hasan’a ve li ebeveyn kız karındaşı Kâtibe nâm hâtuna münhasıra olduğu şer‘an mütehakkik oldukdan sonra mezbûretân Sâime ve Kâtibe mahfil-i kazâda merkūme İsmihan’ın babası ve müteveffâ-yı mezbûrun muhallefâtından irs-i şer‘le isâbet eden hissesini ahz ve kabza vekîl-i sâbitü’l-vekâlesi olan merkūm Mahmud Çelebi mahzarında üzerine da‘vâ edip merkūm Mahmud Çelebi vekâlet-i mahkiyesi hasebiyle muhallefât-ı müteveffâ-yı mezkûreden yüz aded koyun ahz ve kabz ve her biri yüz onar akçe olmak üzere on bir bin akçeye bey‘ edip ve sâir muhallefât-ı mebî‘ası bahâsından dört bin yedi yüz akçe ahz ve kabz edip ve sekiz yüz akçeye beynimizde a‘yân [ve] evsâfı ilm-i şer‘î ile ma‘lûm bir tülbent örtüsü ve sırmalı makrama ve bir sırmalı akçe kesesi ve bir yüz yastığı iştirâ edip cem‘an muhallefât-ı müteveffâ-yı mezkûreden on altı bin beş yüz akçe ahz ve kabz eyledikden sonra muhallefât-ı müteveffâ-yı mezkûr beynimizde alâ mâ farazallâhu te‘âlâ taksîm olundukda mezbûre İsmihan’ın hisse-i şer‘iyyesine ber mûceb-i defter-i kassâm beş bin yüz seksen dört akçe isâbet edip hisse-i mezkûreden fazla merkūm Mahmud Çelebi yedinden on bir bin üç yüz on altı akçe kalmışdır suâl olunup alıverilmesi matlûbumdur dediklerinde gıbbe’s-suâl merkūm Mahmud Çelebi cevâbında fi’l-vâki‘ müteveffâ-yı mezbûrun muhallefâtından vekâletim hasebiyle yüz aded koyununu ahz ve kabz edip on bir bin akçeye bey‘ eyledim ve sâir muhallefât-ı mebî‘ası bahâsından dört bin yedi yüz akçe ahz ve kabz edip ve sekiz yüz akçeye bir tülbent örtüsü ve bir sırmalı makrama ve bir sırmalı kese ve bir yüz yastığı iştirâ eyleyip cem‘an muhallefât-ı mezkûreden on altı bin beş yüz akçe ahz ve kabz eyleyip hîn-i bey‘de üç yüz akçesini mesârif-i mühimmeye harc ve sarf eyledim deyû bi’t-tav‘ ikrâr eylemeğin mûcebiyle mersûme İsmihan’ın hisse-i şer‘iyyesinden fazla kabz eylediği on bir bin on altı akçesi mezbûretân Sâime ve Kâtibe’ye teslîm için merkūm Mahmud Çelebi’ye tenbîh olunup mâ vaka‘a bi’t-taleb ketb olundu. Tahrîren fî evâhiri Recebi’l-mürecceb li sene selâse ve hamsîn ve elf. Şuhûdü’l-hâl: Hüdâyi Kapudân b. Abdurrahman, Davud Efendi b. Abdullah, Mehmed Çavuş b. Abdurrahman Halîfe, Hasan Efendi b. Abdullah el-İmâm, Osman Çelebi, Mehmed Çelebi eş-şehîr bi Mumcuzâde, Ahmed Çavuş, Hasan Çelebi [b.] Hasan, Abdurrahman Halîfe, Mahmud b. İlyas.