Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 331 Hüküm no: 284 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çerkez asıllı Yasemin bt. Abdullah adlı câriyenin azat edildiği İşbu uzun boylu açık kaşlı elâ gözlü Çerkeziyyü’l-asl râfi‘atü’l-kitâb Yasemin bt. Abdullah nâm câriye bundan akdem mahmiye-i Galata’ya tâbi‘ kasaba-i Tophâne mahallâtından Mustafa Ağa mahallesinde sâkin iken vefât eden Ömer Beşe b. Osman nâm müteveffânın zevce-i metrûkesi Râziye Hâtun’u ve sulbî kebîr oğlu Mehmed’i ve sulbiye kebîre kızı İsmihan’ı ve sulbiye kebîre kızı Fâtıma’nın sâbitü’l-vekâle vekîli olan zevci es-Seyyid Mehmed b. es-Seyyid Mustafa’yı meclis-i şer‘a ihzâr ve mahzarlarında takrîr-i da‘vâ edip câriye-i memlûkesi olduğumuz müteveffâ-yı mezbûr Ömer Beşe beni hâl-i hayâtında ve kemâl-i akl-i sıhhatinde tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a intikāl ve irtihâl eyledi benim kıymetime dahi sülüs-i mâlı müsâ‘id olmağla cemî‘ mâlından âzâd olmuşumdur suâl olunup mûcebiyle amel olunması matlûbumdur dedikde gıbbe’s-suâl akībe’l-inkâr müdde‘iye-i mezbûreden da‘vâsını mübeyyine beyyine taleb olundukda udûl-i ricâlden el-Hâc Ali b. Mehmed ve Hasan Beşe b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka müteveffâ-yı mezbûr Ömer Beşe müdde‘iye-i mezbûre Yasemin’i hâl-i hayâtında ve kemâl-i akl-i sıhhatinde tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a intikāl ve irtihâl eyleyip müteveffâ-yı mezbûrun mâlının sülüsü müdde‘iye-i mezbûrenin kıymetine müsâ‘id olmak ile müdde‘iye-i mezbûre âzâd olmuşdur biz bu husûsa bu vech üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinden sonra şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘iye-i mezbûre Yasemin’in ıtkına hüküm birle mâ vaka‘a bi’t-taleb ketb olundu. Cerâ zâlike ve hurrire fi’l-yevmi’s-sâlis ve’l-ışrîn min şehri Ramazâni’l-mübârek li sene 1053. [81b] Şuhûdü’l-hâl: Fahrü’l-kuzât Ramazan Efendi b. Mustafa, fahrü’l-eimme Hızır Efendi b. Kemal, fahrü’l-akrân Siyavuş Ağa b. Abdullah, Mehmed Ağa b. Mustafa, Yusuf Beşe b. Abdullah, Ahmed Bey b. Ali, Mahmud b. İlyas.