Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 342 Hüküm no: 296 Orijinal metin no: [83b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Revani bt. Abdullah ve Mülâyim’in vasiyet yoluyla azat edilmiş olduğu İşbu râfi‘atü’l-kitâb uzun boylu sarışın koyun elâ gözlü siyah kaşlı Rûsiyyü’l-asl Revânî bt. Abdullah nâm câriye bundan akdem mahmiye-i Galata hâricinde Hoca Ali mahallesinde sâkin iken vefât eden Rıdvan Beşe b. Abdullah nâm müteveffânın sulbiye kebîre kızı Münire tarafından vekîl olup vekâleti şer‘an sâbite olan Hüseyin Çelebi b. Receb nâm kimesneyi meclis-i şer‘-i şerîfe ihzâr ve mahzarında üzerine takrîr-i da‘vâ ve ta‘bîr ani’l-merâm edip câriye-i memlûkesi olduğum müteveffâ-yı mezbûr Rıdvan Beşe beni hâl-i hayâtında ve kemâl-i akl-i sıhhatinde tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a irtihâl ve intikāl eyledi benim kıymetime dahi sülüs-i mâl müsâ‘id olmağla cemî‘ mâlından âzâd olmuşundur suâl olunup mûcebi ile amel olunması matlûbumdur dedikde, gıbbe’s-suâl ve akībe’l-inkâr müdde‘iye-i mezbûre Revâni ve Mülâyim’den da‘vâsını mübeyyine beyyine taleb olundukda udûl-i ricâlden Hasan Beşe b. Abdullah ve İskender Beşe b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-hakīka mezbûr Rıdvan hâl-i hayâtında ve kemâl-i akl-i sıhhatinde bizim huzûrumuzda müdde‘iye-i mezbûre Revâni ve Mülâyim’i tedbîr-i mutlak ile tedbîr hâlâ civâr-ı rahmet-i Hayy-i Kayyûm’a irtihâl ve intikāl etmeğin sülüs-i mâlı dahi müdde‘iye-i mezbûrenin [84a] kıymetini müsâ‘id olmağın cemî‘ mâlından âzâd olmuşdur biz bu husûsa bu vech üzere şâhidleriz şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘iye-i mezbûre Revânî ve Mülâyim’in ıtkına hüküm birle mâ vaka‘a gıbbe’t-taleb ketb olundu. Cerâ zâlike ve hurrire fi’l-yevmi’s-sâdis ve’l-ışrîn min Şevvâli’l-mürekkem li sene selâse ve hamsîn ve elf. Şuhûdü’l-hâl: El-Hâc Murad b. Abdullah, Hüseyin Çelebi b. Sefer, el-Hâc Osman b. Abdullah, Hasan b. Abdullah, Murtaza b. Abdullah, Mahmud Çelebi b. Abdullah, Ali Reis b. Abdullah, Mustafa Çelebi b. Mehmed, İbrahim Çelebi b. Mustafa, Osman b. Abdullah.