Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 351 Hüküm no: 305 Orijinal metin no: [86a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Ömer’in muhallefâtından olan evin Mehmed Çelebi’ye satıldığı Mahmiye-i Galata’ya tâbi‘ kasaba-i Tophâne mahallâtından Firuz Ağa mahallesinde sâkine iken bundan akdem vefât eden Fâtıma Hâtun bt. Ömer nâm müteveffâtın verâseti zevci Mehmed Çelebi b. Himmet ve li ebeveyn karındaşı Mustafa’ya ve Ahmed’e ve li ebeveyn kız karındaşı İsmihan nâm hâtuna münhasıra olduğu şer‘an mütehakkik ve mütebeyyin oldukdan sonra mezbûre İsmihan tarafından husûs-ı âti’l-beyânı bey‘a vekîl olup vekâleti sâbite olan Hasan Çelebi b. Mustafa ve li ebeveyn karındaşı mezbûre Mustafa Çelebi meclis-i şer‘-i hatîr-i lâzimü’t-tevkīrde işbu râfi‘ü’l-kitâb mersûm Mehmed Çelebi mahzarında bi’t-tav‘i’s-sâf her birleri ikrâr ve i‘tirâf edip müteveffâ-yı mezbûrenin muhallefâtından olup mahalle-i mezbûrede vâki‘ bir tarafı Kılıç b. Şaban mülkü ve bir tarafı Medîne-i Münevvere vakfı ve bir tarafı Fazlı Çelebi mülkü ve bir tarafı tarîk-i âm ile mahdûd olup iki bâb fevkānî ve bir bâb tahtânî odayı ve kenîfi müştemil olan mülk menzilini bi cümleti’t-tevâbi‘ ve’l-levâhık ve âmmeti’l-menâfi‘ ve’l-merâfık sûk-ı sultânîde kirâren ve mirâren müzâyede olunup rağabât-ı [86b] nâs bi’l-külliye münkatı‘a oldukdan sonra mersûm Mehmed Çelebi üzerinde elli bin nakd-i râyic fi’l-vakt akçede karâr edip ziyâde ile tâlib-i âharı olmamağın mahdûd-ı mezkûru mezbûr Mehmed Çelebi’ye meblağ-ı merkūmda bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i müsemmen eyledik ba‘de’l-yevm sâlifü’z-zikr olan menzil-i mahdûd-ı mezkûru sâir emlâki gibi keyfe mâ yeşâ’ ve yahtâr mutasarrıf olsun dedikde mukırrân-ı mezkûrânın vech-i muharrer üzere cârî olan ikrârını el-mukarru leh merkūm Mehmed Çelebi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu, cerâ zâlike ve hurrire fi’l-yevmi’s-sâdis ve’l-ışrîn min Zilka‘deti’ş-şerîfe li sene selâse ve hamsîn ve elf Şuhûdü’l-hâl: Fahrü’l-kuzât Ramazan Efendi b. Mustafa, umdetü’l-kuzât Mustafa Beşe b. Hasan, Bayram b. Yakub, Zülfikār b. Abdullah, Ahmed Beşe b. Mustafa, Mehmed Çelebi b. Ramazan, Mahmud b. İlyas ve gayruhüm.