Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 352 Hüküm no: 306 Orijinal metin no: [86b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fethi b. Abdullah adlı câriyenin azat edilmiş olduğu İşbu açık kaşlı elâ gözlü sol elinin baş parmağında eser-i cerhi olan râfi‘atü’l-kitâb Fethi bt. Abdullah nâm câriye bunan akdem mahalle-i Galata’ya tâbi‘ kasaba-i Tophâne mahallâtından Firuz Ağa mahallesinde sâkine iken bundan akdem vefât eden Fâtıma bt. Ömer nâm müteveffânın zevci Mehmed Çelebi’yi ve li ebeveyn karındaşı Mustafa Çelebi’yi ve li ebeveyn kız karındaşı İsmihan tarafından vekîli olup vekâleti şer‘an sâbite olan Hasan Çelebi’yi meclis-i şer‘a ihzâr ve mahzarında üzerlerine takrîr-i da‘vâ ve ta‘bîr ani’l-merâm edip câriye-i memlûkesi olduğum müteveffât-ı mezbûre Fâtıma Hâtun beni hâl-i hayâtında ve kemâl-i akl-i sıhhatinde i‘tâk ve tahrîr eyleyip ve silk-i harâire idhâl eyledi suâl olunup mûcebiyle amel olunması matlûbumdur dedikde gıbbe’s-suâl ve akībe’l-inkâr müdde‘iye-i mezbûreden da‘vâsını mübeyyine beyyine taleb olundukda udûl-i ricâlden fahrü’l-eimme Mustafa Efendi b. Mehmed el-İmâm ve Mustafa Beşe b. Ömer nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müteveffât-ı mezbûre Fâtıma Hâtun hâl-i hayâtında ve kemâl-i akl-i sıhhatinde bizim huzûrumuzda câriye-i memlûkem Fethi nâm câriyeyi i‘tâk ve sâir harâire idhâl eyledim deyû ikrâr ve i‘tirâf eyledi biz bu husûsa bu vech üzere şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘iye-i mezbûre Fethi câriyenin i‘tâkına hükm olunup işbu vesîka li ecli’t-temessük ketb olunup yed-i râgibe vaz‘ ve def‘ olundu, cerâ zâlike ve hurrire fi’l-yevmi’s-sâdis ve’l-ışrîn min [Zi]lka‘deti’ş-şerîfe li sene selâse ve hamsîn ve elf. Şuhûdü’l-hâl: Mustafa Beşe b. Hüseyin, Bayram b. Yakub, Abdülkerim b. Abdullah, Zülfikār b. Abdullah, Ahmed Beşe b. Mustafa, Mehmed Çelebi b. Ramazan, Ramazan Efendi b. Mustafa.