Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 357 Hüküm no: 312 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ömer Çavuş’un varislerinden kardeşi Mustafa’nın terekeden hakkını aldığı Mahmiye-i Galata’ya tâbi‘ kasaba-i Tophâne mahallâtından Firuz Ağa mahallesinde sâkine iken bundan akdem fevt olan Fâtıma bt. Ömer Çavuş nâm hâtunun verâseti zevc-i metrûkü Mehmed Çelebi b. Himmet nâm kimesneye ve li ebeveyn karındaşları Mustafa’ya ve Ahmed’e ve hemşîresi İsmihan nâm hâtuna münhasıra olduğu şer‘an mütehakkik oldukdan sonra mezbûr Mustafa meclis-i şer‘-i hatîr-i lâzimü’t-tevkīrde müteveffât-ı mezbûre cümle muhallefâtına vâzı‘ü’l-yed olan zevci mesfûr Mehmed Çelebi mahzarında takrîr-i kelâm ve ta‘bîr ani’l-merâm edip mûrisem ve hemşîrem merhûme Fâtıma’nın muhallefâtından irs-i şer‘î ile bana isâbet eden on sehimden iki sehim hisse-i sâbıkamı mezbûr Mehmed Çelebi yedinden bi’t-tamâm ve’l-kemâl ahz ve kabz eyleyip zimmetini muhallefât-ı müteveffât-ı mezbûrenin bana terettüb eden hisse-i şer‘iyyem da‘vâsından ibrâ-i âm ile ibrâ ve iskāt-ı tâm ile iskāt eyledim ba‘de’l-yevm mazmûn-ı kitâba muhâlif benden asâleten veya vekâleten mezbûr Mehmed Çelebi üzerine da‘vâ ve nizâ‘ sudûr ederse lede’l-hükkâm makbûle olmaya deyû bi’t-tab‘ ve’r-rızâ ikrâr ve i‘tirâf eyledikde mukırr-ı mezbûrun vech-i meşrûh üzere cârî ve sâdır olan kelâmını el-mukarru lehü’l-merkūm Mehmed Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb kayd ve ketb ve yed-i tâlibe vaz‘ ve def‘ olundu. Cerâ zâlike ve hurrire fi’l-yevm min Zilhicceti’ş-şerîfe li sene selâse ve hamsîn ve elf. Şuhûdü’l-hâl: Ramazan Efendi b. Mustafa, Halil Efendi el-Müsta‘id, el-Hâc Ali b. Ömer, Ömer Beşe b. Abdullah, Cafer Ağa b. Süleyman, Mustafa Efendi b. Mehmed, Haydar b. Abdullah, Mahmud b. İlyas.