Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 356 Hüküm no: 311 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Keyvan b. Abdullah’ın kitâbet yoluyla azat olunduğu İşbu orta boylu sarı yüzlü başında eser-i cerâhat olan Rûsiyyetü’l-asl râfi‘ü’l-kitâb Keyvan b. Abdullah bundan akdem mahmiye-i Galata’ya tâbi‘ kasaba-i Tophâne mahallâtından Firuz Ağa mahallesinde sâkine iken vefât eden Fâtıma Hâtun bt. Ömer’in zevc-i metrûkü Mehmed Çelebi’yi ve li ebeveyn kız karındaşı tarafından vekîl olup vekâleti şer‘an sâbite olan Hasan Çelebi’yi ve li ebeveyn karındaşı Mustafa Çelebi’yi meclis-i şer‘a [88a] ihzâr ve mahzarlarında üzerlerine takrîr-i da‘vâ ve ta‘bîr ani’l-merâm edip abd-i memlûkesi olduğum müteveffât-ı merkūme Fâtıma Hâtun hâl-i hayâtında ve kemâl-i akl-i sıhhatinde beni altı bin akçeye kitâbete kesip bedel-i kitâbetten üç bin üç yüz akçesin edâ ve teslîm eyledim hâlâ zimmetimde bedel-i kitâbetten iki bin yedi yüz akçesi bâkī kalmışdır suâl olunup tamâmen edâsı müyesser oldukda âzâd olunması matlûbumdur dedikde gıbbe’s-suâl ve akībe’l-inkâr müdde‘î-i merkūmdan da‘vâsını mübeyyin beyyine taleb olundukda udûl-i ricâlden Mustafa Efendi b. Mehmed el-İmâm ve Mustafa Çelebi b. Ömer nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müteveffât Fâtıma Hâtun müdde‘î-i merkūm Keyvan’ı altı bin akçeye kitâbete kesip üç bin üç yüz akçesin ahz ve kabz eyledim bâkī kalan zimmetinde kaldı deyû bizim huzûrumuzda hâl-i hayâtında ve kemâl-i akl-i sıhhatinde ikrâr ve i‘tirâf edip bizi dahi işhâd eyledi biz bu husûsa bu vech üzere şâhidleriz şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘î-i mezbûr Keyvan’ın bedel-i kitâbetini tamâmen edâ ve teslîm müyesser oldukda ıtkına hükm olunup işbu vesîka li ecli’t-temessük yed-i râgıba vaz‘ ve def‘ olundu, cerâ zâlike ve hurrire fi’l-yevmi’s-sânî min Zilhicceti’ş-şerîfe li sene selâse ve hamsîn ve elf. Şuhûdü’l-hâl: Fahrü’l-kuzât Ramazan Efendi b. Mustafa, umdetü’l-kuzât Receb Efendi b. ( ), Mustafa Beşe b. Hüseyin, Abdülkerim b. Abdullah, Zülfikār b. Abdullah.