Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 53 Hüküm no: 8 Orijinal metin no: [1b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstirati Reis ile Nikola v. Yorgi arasında alacak verecek meselelerinin kalmaması Vilâyet-i Anadolu’da kasaba-i Mudanya sükkânından İstirati Reis v. Aci Yorgi nâm zimmî mahfil-i kazâda fi’l-asl vilâyet-i Rumeli’nde Mora sancağında vâki‘ Mizistre kazâsına tâbi‘ Aliviro nâm karyeden olup hâlâ mahmiye-i Galata’da sâkin işbu râfi‘ü’l-vesîka Nikola v. Yorgi nâm zimmî muvâcehesinde ikrâr ve takrîr-i kelâm edip bundan akdem mezbûr Nikola’ya her müdresi yüz otuz akçeye olmak üzre elli beş müdre ırak cem‘an yedi bin yüz akçeye bey‘ ve teslîm ol dahi iştirâ ve tesellüm eyledikden sonra semen-i mezbûrun iki bin yedi yüz akçesini mezbûr Nikola’ya sefîne bahâsından olan yirmi beş bin akçe deynimden iki bin yedi yüz akçesine takās ol dahi mukāssa ve kabûl edip bâkī dört bin dört yüz akçesini ve mezbûrun yedine emâneten def‘ eylediğim altı kebîr şıra fıçılarımı hâlâ mezbûrdan ahz ü kabz eylediğimden sonra târih-i kitâba gelinceye değin beynimizde bey‘ ü şirâ ve ahz ü i‘tâ cihetinden vâki‘ olan mu‘âmelâta müte‘allika âmme-i de‘âvî ve mütâlebâtdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘-i aşer min şehri Recebi’l-ferd li sene selâse ve seb‘în ve elf Şuhûdü’l-hâl: Süleyman Efendi b. Nâib-i sicil, Mehmed Beşe b. Mustafa Çukadâr, Abdülbâkī Bey b. Hasan Ser-muhzırân, Ahmed Yazıcı b. Mehmed, Mustafa b. Receb, el-Hâc Cafer b. Yakub, Musa b. Receb