Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 55 Hüküm no: 12 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Galata’da devlet tarafından satılan arsayı müştereken alan İngiliz, Fransız tercümanları ile diğerlerinin hisselerinin belirlenmesi Husûs-ı âti’l-beyânın mahallinde tahrîri iltimâs olunmağın savb-ı şer‘den mefharü’l-müderrisîni’l-kirâm Abdülgaffâr Efendi irsâl olunup ol dahi hâssa mi‘mârlarından üstâd Şaban b. Veli ve zeyl-i kitâbda muharrerü’l-esâmî olan müslimîn ile mahmiye-i Galata dâhilinde vâki‘ bir tarafdan Yani ve Yorgi nâm zimmîler fırını ve ba‘zan Serdâr Mustafa mülkü ve bir tarafdan Andoni zimmî mülkü ve bir tarafdan ba‘zan tarîk-i âm ve bir tarafdan Sabri Mehmed Efendi mülkü ve bir tarafdan Mi‘mâr Ağa mülkü ve ba‘zan Andonaki mülkü ile mahdûd ve San Françesko kilisesi demekle ma‘rûf kilise arsasının üzerine varıp akd-i meclis-i şer‘-i şerîf eyledikde ashâb-ı hâze’s-sifr İngiliz tercümânı Andonaki v. İstefani Fransız tercümânı Tomazo v. Batişta ve Kaspar v. Anton ve Françesko v. Aleksi ve Domeniko v. Cuvan ve Nikoroz v. Franko ve Cuvan v. Karlo nâm zimmîler meclis-i ma‘kūd-ı mezbûrda her biri takrîr-i kelâm ve ta‘bîr ani’l-merâm edip bundan akdem arsa-i mezbûre ba‘de’l-harîk taraf-ı mîrîden zabt olunup yine cânib-i mîrîden âhara bey‘ olundukda arsa-i mezbûreyi semen-i ma‘lûme cümlemiz ale’l-iştirâki’s-seviy almışidik, hâlâ arsa-i merkūme mesâha olunup her birimizin hissesi ta‘yîn ve tahsîs ve alâmât-ı fâsıla vaz‘ olunmak matlûbumuzdur dediklerinde mi‘mâr-ı merkūm arsa-i mezkûreyi mesâha eyledikde bennâ zirâ‘ ile bi hesâb-ı şatrancî beş bin kırk zirâ‘a bâliğ olup zikr olunan beş bin kırk zirâ‘ arsa yedi sehim i‘tibâr olunup her sehime beş yüz yirmişer zirâ‘ arsa isâbet eylediği mütebeyyin oldukdan sonra arsa-i mahdûd-ı mezbûrdan olup bir tarafdan müşterek duvar ile Sabri Mehmed Efendi mülkü ve bir tarafdan mezbûrân Yani ve Yorgi’nin mülkü olan fırın ve bir tarafdan mezbûrân Kaspar ve Françesko hisselerine ta‘yîn olunan arsa ve bir tarafdan tarîk-i âm ile mahdûd bin dört yüz kırk zirâ‘ arsa merkūmân Andonaki ve Tomazo hisselerine ta‘yîn ve tahsîs olunup yine bir tarafdan mezbûrân Andonaki ve Tomazo’ya ta‘yîn olunan arza ve bir tarafdan serdâr-ı mezbûr Mustafa Çelebi mülkü ve ba‘zan merkūm Nikoroz tasarrufunda olan vakıf mahzen ve bir tarafdan merkūmân Nikoroz ve Domeniko’ya ta‘yîn olunan arsa ve bir tarafdan tarîk-i âm ile mahdûd ve iki bi’r-i mâyı müştemil bin dört yüz kırk zirâ‘ arsa dahi mezbûrân Kaspar ve Françesko hisselerine ta‘yîn ve tahsîs olunup ve yine bu tarafdan mezbûrân Kaspar ve Françesko’ya ta‘yîn olunan arsa ve bir tarafdan tarîk-i âm ve bir tarafdan mi‘mâr Ağa ve ba‘zan Andonaki mülkü ve bir tarafdan merkūm Cuvan’a ta‘yîn olunan arsa ile mahdûd bir sarnıcı müştemil bin dört yüz kırk zirâ‘ arsa mezbûrân Nikoroz ve Domeniko hisselerine ta‘yîn ve tahsîs olunup ve yine bir tarafdan mezbûrân Nikoroz ve Domeniko’ya ta‘yîn olunan arsa ve iki tarafdan Andonaki mülkü ve bir tarafdan tarîk-i âm ile mahdûd yedi yüz yirmi zirâ‘ arsa dahi merkūm Cuvan’ın hissesine ta‘yîn ve tahsîs olundukdan sonra mezbûrûnun her biri ta‘yîn olunan hisselerini ba‘de’l-ikrâr ve alâmât-ı fâsıla vaz‘ olundukdan sonra meclis-i mezbûrda kabz ve tesellüm ve kabûl eylediklerini mûmâ-ileyh efendi ol mahalde ketb ve tahrîr ba‘dehû hüddâm-ı mahkemeden olup kendi ile ma‘an mahall-i mezbûre irsâl olunan Mehmed Beşe b. Mustafa ile gelip meclis-i şer‘a alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis aşer min Recebi’l-ferd sene selâse ve seb‘în ve elf Şuhûdü’l-hâl: Mustafa b. Süleyman, Mehmed Bey b. Ali, Mehmed b. Abdullah, Mustafa b. Receb, Emrullah b. Mehmed, Mehmed b. Receb ve gayruhüm