Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 57 Hüküm no: 13 Orijinal metin no: [2a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zafiri bt. Yakomi’nin Malamatine ile olan alacak davasının sona ermesi Mahrûsa-i Galata İstanbul hısnı ebvâbından Ayakapısı dâhilinde sâkine Zafiri bt. Yakomi nâm nasrâniye mahfil-i kazâda bâ‘isetü hâze’l-vesîka Malamatine bt. ( ) nâm nasrâniye tarafından sulh-i câi’z-zikre ve bedelini def‘a sâbitü’l-vekâle vekîli ve vasî olan Nikola v. Hristo nâm zimmî muvâcehesinde ikrâr ve takrîr-i kelâm edip mülk-i mevrûsum olan bir benefşe çukaya kaplı bir sansar paçası ve bir mâî kutnî kaftan ve bir dârâyî kaftanımı müvekkile-i merkūmeye bi tarîki’l-emâne def‘ ve teslîm ol dahi kabz ve tesellüm edip hâlâ eşyâ-i merkūmeyi müvekkile-i mezbûreden taleb ve da‘vâ etmekle beynimizde münâza‘ât-ı kesîre ve muhâsamât-ı şedîde vâkı‘a oldukdan sonra vesâtat-ı muslihîn ile mezbûre Malamatine da‘vâ-yı mezkûremden beni bin akçe üzerine sulh eyledikde ben dahi sulh-i mezbûru kabûl ve bedeli olan meblağ-ı mezbûr bin akçeyi vekîl-i mezbûr Nikola yedinden tamâmen ahz ü kabz edip eşyâ-i mezkûreye müte‘allika âmme-i da‘vâdan müvekkile-i mezbûre Malamatine’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Mehmed Çavuş b. Mehmed el-Mübâşir, Musa b. Receb, Âbid b. Mustafa, Emrullah b. Mehmed, Muharrem b. Receb ve gayruhüm