Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 91 Hüküm no: 60 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Argir’in Bereketzâde’deki evini Nikola v. Petro’ya satması Mahmiye-i Galata dâhilinde Bereketzâde mahallesinde sâkin Kirkor v. Argir nâm Ermeni mahfil-i kazâda râfi‘-i hâze’l-kitâb Nikola v. Petro nâm zimmî muvâcehesinde ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan merhûme Nurcihan Hâtun vakfı ve bir tarafdan Asvader zimmî veresesi mülkleri ve bir tarafdan Mihman Hâtun mülkü ve bir tarafdan tarîk-i âm ile mahdûd tabaka-i ulyâsında üç bâb odaları bir sofa ve vustâsında üç bâb odalar ve bir sofa ve süflâda iki bâb odalar ve bi’r-i mâ ve muhavvata ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık yüz on bin fıddî râyic fi’l-vakt akçeye merkūm Nikola’ya tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı merkūm yüz on bin akçeyi mezbûr Nikola yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr mersûm Nikola’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Mehmed Efendi b. Mehmed el-İmâm, Ahmed Yazıcı b. Mehmed, Mustafa Çelebi b. el-Hâc Ali, el-Hâc İbrahim b. Ali, İbrahim b. Receb, Mehmed b. Ali, Mustafa Çelebi b. Receb