Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 92 Hüküm no: 62 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstirati v. Dimitri’nin meyhaneci Yani v. Filibo’yu yaralamadığına yemin etmediğinin tespiti Mahmiye-i Galata dâhilinde meyhâneci tâifesinden Yani v. Filibo nâm zimmî mahfil-i kazâda İstirati v. Dimitri nâm zimmî muvâcehesinde üzerine da‘vâ ve takrîr-i kelâm edip târih-i kitâb günü kable salâti’z-zuhr Topal zimmî meyhânesinde iken merkūm İstirati bir kara saplı bıçak ile sol ayağımın topuğu üzerine bi gayr-ı vech-i şer‘î darb ve beni mecrûh etmeğin suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin târih-i mezbûrda zikr olunan kara saplı bıçak ile müdde‘î-i merkūmun sol ayağı topuğunun üzerine darb ve mecrûh etmediğine mezbûr İstirati’ye yemîn teklîf olundukda yemînden nükûl etmeğin mûcebiyle mâ vaka‘a bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Musa b. Receb, Mustafa Çelebi b. Receb, Âbid b. Mustafa, Emrullah b. Mehmed