Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 92 Hüküm no: 63 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Beşe b. Abdullah’ın Kesmeköy’deki ev ve bağını Haçuk ve müvekkillerine sattığı, tasarrufundaki tarlaları da devrettiği Vilâyet-i Anadolu’da Divriği kazâsına tâbi‘ Kesmeköy demekle ma‘rûf karye sükkânından Sâlih Beşe b. Abdullah meclis-i şer‘-i hatîr-i lâzımü’t-tevkīrde kendi tarafından asîl ve li ebeveyn karındaşları Onnik ve Bülbül ve Arakil nâm Ermeniler taraflarından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan Haçuk v. Kirkor nâm Ermeni muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Masos nâm Ermeni mülkü ve bir tarafdan Avanos nâm Ermeni mülkü ve bir tarafdan Osman Beşe [b.] Ali ve bir tarafdan tarîk-i âm ile mahdûd üç bâb tahtânî odaları ve kenîfi ve avluyu müştemil mülk menzilimi ve yine karye-i mezbûrede vâki‘ inde’l-ahâlî ve’l-cîrân ma‘lûmü’l-hudûd iki dönüm mülk bağımı vekîl-i mezbûr Haçuk ile müvekkilleri mezbûrûn Onnik ve Bülbül ve Arakil’e bi safkatin vâhidetin dokuz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk anlar dahi ale’l-iştirâki’s-seviy iştirâ ve kabûl edip ve yine karye-i mezbûre sınırında vâki‘ mevâzi‘-i müteferrikada vâki‘ inde’l-ahâlî ve’l-cîrân ma‘lûmü’l-hudûd on altı kıt‘a tarlalarımın hakk-ı tasarruflarını dahi sâhib-i arz ma‘rifetiyle üç bin beş yüz akçe bedel mukābelesinde mezbûrûna ferâğ ve tefvîz ettim anlar dahi kezâlik ale’l-iştirâki’s-seviy tefevvuz ve kabûl eylediklerinden sonra semen-i mezbûr dokuz bin akçe ile bedel-i merkūm üç bin beş yüz akçe ki cem‘an on iki bin beş yüz akçeyi asâlet ve vekâlet hasebiyle mezbûr Haçuk yedinden tamâmen ahz ü kabz edip sâlifü’z-zikr menzil ve bağ ve tarlaları mahallinde kabz ve tasarrufa mezbûrûnu taslît eyledim ba‘de’l-yevm zikr olunan menzil ve bağ mezbûrların mülk-i müşterâsıdır ve tarlalar dahi hakk-ı müfevvazlarıdır keyfe mâ yeşâ’ ve yahtâr mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam sene 1073 Şuhûdü’l-hâl: Hüseyin Beşe b. Abdullah, Budak b. Maksud, Mehmed b. Abdi, Rıdvan, Musa b. Receb, Mustafa b. Receb, Mustafa b. Zülfikār