Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 98 Hüküm no: 73 Orijinal metin no: [10(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marudi v. Preşkova’nın Vasil v. Lazari’ye borcu olduğunu kabul etmesi Medîne-i Sinop sükkânından işbu râfi‘ü’s-sifr Vasil v. Lazari nâm zimmî mahfil-i kazâda Marudi v. Preşkova nâm zimmî muvâcehesinde üzerine da‘vâ ve takrîr-i kelâm edip mezbûr Marudi zimmetinde cihet-i deyn-i şer‘îden iki bin akçe hakkım olup meblağ-ı mezbûrun bin akçesini mukaddemâ yedinden ahz ü kabz edip bin akçesi zimmetinde bâkī kalmağla hâlâ meblağ-ı bâkīyi mezbûrdan taleb ederim suâl olunsun dedikde gıbbe’s-suâl mezbûr Marudi cevâbında fi’l-vâki‘ müdde‘î-i merkūm Vasil’e minvâl-i muharrer üzre cihet-i mezkûreden bâkī bin akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin alâ mûceb-i i‘tirâfihî meblağ-ı mezbûru müdde‘î-i merkūma edâ ve teslîme mezbûr Marudi’ye tenbîh birle mâ vaka‘a bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: El-Hâc Cafer b. Yakub, Hüseyin b. Abdullah, Ahmed Yazıcı b. Mehmed, Mustafa b. Receb, Muharrem b. Receb