Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 97 Hüküm no: 72 Orijinal metin no: [10(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgaki v. Preşkova’nın Ali Beş b. Muharrem’e borcu olduğunun tespiti Mahmiye-i Galata dâhilinde Câmi‘-i Kebîr mahallesinde sâkin işbu râfi‘ü’l-vesîka Ali Beşe b. Muharrem nâm kimesne meclis-i şer‘-i hatîr-i lâzımü’t-tevkīrde Yorgaki v. Preşkova nâm zimmî mahzarında üzerine da‘vâ ve takrîr-i kelâm edip mezbûr Yorgaki zimmetinde cihet-i karz-ı şer‘îden bin yedi yüz akçe hakkım vardır hâlâ mezbûrdan taleb ederim suâl olunsun dedikde gıbbe’s-suâl merkūm Yorgaki cevâbında müdde‘î-i mezbûr Ali Beşe’ye cihet-i merkūmeden zimmetimde ancak bin dört yüz akçe deynim vardır deyû ikrâr ziyâde üç yüz akçeyi inkâr edicek müdde‘î-i mezbûrdan ziyâde müdde‘âsını mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl ikrârı olan meblağ-ı mezbûr bin dört yüz akçeyi müdde‘î-i mezbûre edâ ve teslîme merkūm Yorgaki’ye tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Hüseyin b. Mirza, Emrullah b. Mehmed, Hüseyin b. Abdullah, Hasan b. Bayezid, Muharrem b. Receb