Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 99 Hüküm no: 75 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vekil Ahmed b. Mustafa’nın, Ahmed Reis’in kaybolan cariyesini evinde bulduğu Ahmed Bey’e sattığı Mahmiye-i Galata müzâfâtından kasaba-i Tophâne’de Çukurmescid mahallesinde sâkin Ahmed Reis b. Pîrî tarafından husûs-ı âti’z-zikre vekîl olup Yunus b. Abdullah ve el-Hâc Veli b. Şaban nâm kimesneler şehâdetleriyle hasm-ı şer‘î-i câhid mahzarında şer‘an vekâleti sâbite olan Ahmed b. Mustafa nâm kimesne mahfil-i kazâda mahrûsa-i Üsküdar’a tâbi‘ Şile nâm kasaba sükkânından işbu râfi‘ü’l-kitâb Ahmed Bey b. İbrahim mahzarında bi’l-vekâle ikrâr ve takrîr-i kelâm edip târih-i kitâbdan on sene mukaddem müvekkilim merkūm Ahmed Reis’in Rusiyyetü’l-asl Belkıs nâm bir câriye-i memlûkesi menzilinden ibâk edip bundan akdem mevsûfe-i merkūme Belkıs her kimin yedinde bulunursa ondan taleb ve da‘vâya ve ahz ü kabza ve âhara bey‘a merkūm Ahmed Reis beni vekîl etmekle ben dahi müvekkilimin câriyesi olan mevsûfe-i merkūmeyi hâlâ merkūm Ahmed Bey’in yedinde bulmağla mezbûreyi merkūm Ahmed Bey’den taleb ve da‘vâ ol dahi yedinde olan câriye-i mezbûre reis-i mezbûrun mülkü olduğunu i‘tirâf etmekle mezbûreyi yedinden ahz ü kabz edip vekâlet-i mahkiyem hasebiyle yine mevsûfe-i merkūmeyi on bir bin akçeye mezbûr Ahmed Bey’e bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mersûm Ahmed Bey yedinden bi’t-tamâm ahz ü kabz edip ba‘de’l-yevm mezbûre Belkıs merkūm Ahmed Bey’in câriye-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâmin min şehr-i Ramazâni’l-mübârek li sene selâse ve seb‘în ve elf Şuhûdü’l-hâl: Kasım Çelebi b. Haydar el-Mübâşir, Ali Reis b. Mustafa, yelkenci Mahmud Çelebi b. Abdullah, ehl-i hibre Mustafa Kapudân b. Musa, el-Hâc Veli b. İsa, Hüseyin b. Ali, Mustafa Çelebi b. Receb, Emrullah b. Mehmed ve gayruhüm mine’l-huzzâr