Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 107 Hüküm no: 88 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Abdullah’ın bazı eşyalarını azatlısı Gülistan bt. Abdullah’a hibe etmesi Husûs-ı âti’l-beyânın mahallinde tahrîri iltimâs olunmağın küttâb-ı mahkemeden mevlânâ Mehmed Efendi irsâl olunup ol dahi zeyl-i kitâbda mastûrü’l-esâmî olan müslimîn ile mahmiye-i Galata hâricinde Hüseyin Ağa mahallesinde sâkine Râziye bt. Abdullah nâm hâtunun menziline varıp akd-i meclis-i şer‘-i şerîf eyledikde mezbûre Râziye Hâtun meclis-i ma‘kūd-ı mezbûrda râfi‘atü hâze’l-kitâb mu‘takası Gülistan bt. Abdullah mahzarında bi tav‘ihâ ikrâr ve takrîr-i kelâm edip silk-i mülk-i sahîhimde münselik olan eşyâmdan üç yemeni yorgan ve on münakkaş yastık ve üç beledî minder ve bir beledî döşek ve bir orta keçesi ve bir kaliçe ve beş tencere ve bir bakır sini ve üç baklava tepsisi ve iki bakır leğen ve bir ibrik ve bir hamam leğeni ve bir tava ve bir bakır sahan ve iki küçük sahan ve bir beyaz kebe ve bir bakır kazganımı mezbûre Gülistan’a hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl edip min ba‘d eşyâ-i merkūme mezbûre Gülistan’ın mülk-i mevhûbesidir. Keyfe mâ teşâ’ mutasarrıfe olsun dedikde vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî ihbâr ve takrîr etmeğin mâ vaka‘a bi’t-taleb ketb olundu. Fî gurreti Ramazân sene 1073 Şuhûdü’l-hâl: Abdülkādir Efendi b. İbrahim, Ahmed Çelebi [b.] Yakub Müezzin, İslâm Beşe [b.] Süleyman, Seyyid İbrahim [b.] Seyyid Halil, Seyyid Hasan [b.] Seyyid Mustafa, Derviş Yusuf [b.] Mehmed, Ahmed Çelebi [b.] İbrahim Şerbetî.