Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 106 Hüküm no: 87 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Musa’ya ait evin mirasçılarının vekili tarafından Çukacı Angeli’ye satıldığı Mahrûsa-i Galata müzâfâtından kasaba-i Beşiktaş’a tâbi‘ Ortaköy nâm karyede sâkine iken bundan akdem hâlik olan Hani cemâ‘atinden Yasef v. Musa nâm yahudinin verâseti zevce-i metrûkesi Kaloyera nâm yahudiye ile sulbiye-i kebîre kızı Camede’ye ve li ebeveyn er karındaşı İlya’ya ve li ebeveyn kız karındaşı Sazbat nâm yahudiyeye münhasıra olduğu şer‘an zâhir ve mütehakkik oldukdan sonra mezbûrûn taraflarından menzil-i câi’z-zikri bey‘a ve kabz-ı semene vekîl-i müseccelleri olan Selânik cemâ‘atinden Azarya v. Mosi nâm yahudi meclis-i şer‘-i hatîr-i lâzımü’t-tevkīrde mahrûsa-i merkūmede Sultan Bayezid mahallesi sükkânından işbu hâmilü’s-sifr çukacı Angeli v. ( ) nâm zimmî tarafından ikrâr-ı âti’l-beyânı tasdîka vekîl olup hasm-ı şer‘î-i câhid mahzarında Aster v. Yanaki nâm zimmî ve Gürüz cemâ‘atinden İsrail v. Yasef nâm yahudi şehâdetleri ile şer‘an vekâleti sâbite olan Yanaki v. Mihal nâm zimmî muvâcehesinde bi’l-vekâle ikrâr ve takrîr-i kelâm edip mahalle-i merkūmede vâki‘ bir tarafdan merkūm Angeli mülkü ve ba‘zan Sultana nâm nasrâniye mülkü ve bir tarafdan Karanfil nâm zimmî mülkü ve bir tarafdan Kürkçü Nikola nâm zimmî mülkü ve bir tarafdan Kirkor nâm Ermeni mülkü ile mahdûd iki bâb tahtânî beyti ve bi’r-i mâyı ve şadırvanı ve üç aded taş tekneyi ve tûlen otuz altı ve arzan on bir buçuk bi hesâb-ı terbî‘î dört yüz on zirâ‘ zât-ı eşcâr-ı müsmire ve gayr-ı müsmire bahçeyi müştemil mülk menzil hâlik-i merkūm Yasef’in ile’l-helâk mülkü olup ba‘de helâkihî veresesi müvekkilûn-ı merkūmûna intikāl etmekle hâlâ menzil-i mahdûd-ı mezkûru vekâletim hasebiyle müvekkil mezbûr Angeli’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz kıt‘a riyâlî guruşa bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr altı yüz kıt‘a riyâlî guruşu vekâleten müvekkil-i mezbûr Angeli yedinden bi’t-tamâm ve’l-kemâl ahz ü kabz eyledim, ba‘de’l-yevm menzil-i mahdûd-ı mezkûr müvekkil-i merkūm Angeli’nin mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min şehri Ramazâni’l-mübârek li sene selâse ve seb‘în ve elf Şuhûdü’l-hâl: El-Hâc Kenan Beşe b. Abdullah Kethüdâ, el-Hâc Süleyman b. Receb, Ahmed b. Ramazan, Nasuh Efendi b. Eyüb, es-Seyyid Ali Çelebi b. Mustafa, Ebûbekir b. Şaban Çukadâr, Ahmed Yazıcı b. Mehmed, Mustafa b. Receb, el-Hâc Cafer b. Yakub, Âbid b. Mustafa, Muharrem b. Receb ve gayruhüm.