Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 108 Hüküm no: 90 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hâtun bt. Mustafa’nın el-Hâc Ahmed b. Hasan’a evi istiğlâl yoluyla satması ve vekil tayini Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ Abdülkerim Efendi b. Mehmed irsâl olunup ol dahi zeyl-i vesîkada isimleri mastûr olan müslimîn ile mahrûsa-i Galata müzâfâtından kasaba-i İstinye’de Mahmud Çavuş mahallesinde sâkine Sâliha Hâtun bt. Mustafa Ağa’nın menziline varılıp akd-i meclis-i şer‘-i şerîf oldukda mezbûre Sâliha Hâtun meclis-i ma‘kūd-ı mezbûrda dergâh-ı âlî yeniçerilerinin kırk ikinci ağa bölüğü odası fukarâtına vakf olunan akçenin nukūd-ı mevkūfesine bi’l-fi‘l mütevellî olan işbu râfi‘ü’l-kitâb el-Hâc Ahmed b. Hasan nâm kimesne mahzarında ikrâr ve takrîr-i kelâm edip mahalle-i merkūmede vâki‘ bir tarafdan fahrü’l-akrân Ahmed Ağa b. Mehmed nâm kimesne mülkü ve bir tarafdan Laklakī Osman Beşe b. Hamza nâm kimesne mülkü ve bir tarafdan yine kendi bağım ve bir tarafdan tarîk-i âm ile mahdûd mülk menzilim mütevellî-i merkūm el-Hâc Ahmed’e dört yüz esedî guruşa bi tarîki’l-istiğlâl bey‘ ve teslîm ol dahi mâl-ı vakfı mezbûr ile iştirâ ve tesellüm ve kabûl edip semeni olan meblağ-ı merkūme dört yüz esedî guruşu yedinden tamâmen ahz ü kabz eylediğimden sonra mezbûr el-Hâc Ahmed menzil-i mersûmu gıbbe’t-tahliyye ve’t-tekābuz târih-i kitâbdan yüz seksen gün tamâmına değin kırk esedî guruş ücret ile bana îcâr ve teslîm edip ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mezbûre Sâliha Hâtun’un zevci Mustafa Çelebi b. Ömer nâm kimesne menzil-i merkūmun derkine ve ücret-i lâzımesine tarafeynden emr-i kabûlü hâviye kefâlet-i sahîha-i şer‘iyye ile kefîl oldukdan sonra mezbûre Sâliha Hâtun yine meclis-i mezbûrda Ömer Beşe b. Mehmed nâm kimesne mahzarında i‘âde-i kelâm edip ben meblağ-ı mezbûr dört yüz kırk esedî guruşu müddet-i mezbûre tamâmında mezbûr el-Hâc Ahmed’e edâ eylemezsem menzil-i mahdûd-ı mezkûru semeni misli ile bey‘a ve semeninden deyn-i mezkûru edâya ve meblağ-ı bâkīyi bana îsâle azl ve in‘izâlden masûne vekâlet-i devriyye ile merkūm Ömer Beşe’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve hizmet-i lâzımesin edâya müte‘ahhid olduğun[u] mevlânâ-yı mezbûr mahallinde tahrîr edip ma‘an ba‘s olunan el-Hâc Cafer b. Yakub ile meclis-i şer‘a gelip vukū‘u üzre inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene selâse ve seb‘în ve elf Şuhûdü’l-hâl: Dersiâm Hasan Efendi b. Hüseyin, Murad Efendi b. Şaban el-İmâm, Mehmed Çelebi b. Hüseyin, İbrahim Çelebi b. Mustafa, Yusuf Çelebi b. Abdullah, Hasan Çelebi b. Abdullah, Hüseyin Çelebi b. Abdullah, Hüseyin Çelebi b. Mahmud, Mustafa Çelebi b. Ali, Mustafa Beşe b. Murad, Zülfikār b. Abdullah, Abdülkerim b. Abdullah, fahrü’l-kuzât Mehmed Efendi b. Hasan, İbrahim b. Hasan, Ali b. Veli ve Rıdvan b. Abdullah, İbrahim Beşe Kayıkçı, Ahmed b. Rıdvan, Ahmed b. Ramazan, el-Hâc Cafer b. ( ) ve gayruhüm.