Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 109 Hüküm no: 91 Orijinal metin no: [13a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. İlyas’ın evini Muharrem b. Ali’ye satıp parasını aldığı Mahrûsa-i Galata’ya tâbi‘ kasaba-i Kasımpaşa’da el-Hâc Ahmed mahallesinde sâkine Sâime bt. İlyas nâm hâtun meclis-i şer‘-i hatîr-i lâzımü’t-tevkīrde sâhib-i hâze’l-kitâb el-Hâc Muharrem b. Ali nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olup mahalle-i merkūmede vâki‘ bir tarafdan Ali b. Şerif nâm kimesne mülkü ve bir tarafdan Ahmed Reis b. Hamza nâm kimesne mülkü ve bir tarafdan Sâime bt. ( ) nâm hâtun mülkü ve bir tarafdan tarîk-i âm ile mahdûd üç bâb fevkānî ve bir bâb tahtânî odaları ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cümle tevâbi‘ ve levâhıkı ile mezbûr el-Hâc Muharrem’e otuz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mezbûr el-Hâc Muharrem yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr mezbûr el-Hâc Muharrem’in mülk-i müşterâsı olup benim kat‘â alâka ve medhalim yokdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve terkīm olundu. Fi’l-yevmi’s-sâdis min şehri Ramazâni’l-mübârek li sene selâse ve seb‘în ve elf. Şuhûdü’l-hâl: Şeyh Mehmed Efendi b. Ali, Hasan Efendi b. Şaban el-İmâm, Hasan Halîfe b. Ahmed el-Müezzin, Halil Çelebi b. Mehmed, İsmail Çelebi b. Mehmed, Musli b. Abdullah (…), Mustafa Çelebi b. Mehmed el-Mütevellî, Mehmed Sofu b. Hüseyin, Mehmed Beşe b. Abdullah, bölükbaşı Musa Beşe b. Receb, fahrü’l-kuzât Nasuh Efendi b. Yusuf, Ebûbekir Beşe b. Şaban Çukadâr, Emrullah b. Mehmed, Hüseyin b. Mirza.