Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 112 Hüküm no: 95 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yordan Reis v. Yorgi’nin buğday parasından dolayı Arakil v. Frader’e açtığı davanın düşmesi Vilâyet-i Rumeli’nde Balçık kazâsına tâbi‘ Kavarna nâm karye sükkânından Yordan Reis v. Yorgi nâm zimmî mahfil-i kazâda Karaköy’de ekmekçi tâyifesinden râfi‘u hâze’l-kitâb Arakil v. Ferader nâm Ermeni muvâcehesinde üzerine da‘vâ ve takrîr-i kelâm edip târih-i [kitâbdan] dokuz ay mukaddem mahrûsa-i İstanbul’da Unkapanı’nda her keyli yirmi dokuz akçeye olmak üzre bin aded keyl-i İstanbulî buğdayımı cem‘an yirmi dokuz bin akçeye merkūm Arakil’e bey‘ ve teslîm ol dahi kabz ve tesellüm eyleyip semeni olan meblağ-ı merkūm zimmetinde kalmağla hâlâ taleb ederim suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin târih-i kitâbdan müdde‘î-i merkūmun yedinden kapan-ı mezbûrda bin aded keyl-i İstanbulî buğdayını semen-i merkūm ile iştirâ etmediğine mezbûr Arakil’e yemîn teklîf olundukda ol dahi hasbe’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle mu‘ârazadan men‘ birle mâ vaka‘a bi’t-taleb ketb olundu. Tahrîren fi’l-yevmi’s-sâbi‘ min şehr-i Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Ahmed Yazıcı b. Mehmed, Emrullah b. Mehmed, Âbid b. Mustafa, Hüseyin b. Abdullah, Muharrem b. Receb, Zülfikār b. İbrahim ve gayruhüm.